ވ.އަތޮޅަށް ޑައިވިނަށް ގޮސް އުޅެނިކޮށް ގެއްލުނު ހަތަރު މީހުން ހޯދުމަށް ދިވެހި ސިފައިން ކުރިއަށްގެންދާ އޮޕަރޭޝަނަށް އެހީތެރިކަން ފޯރުކޮށްދިނުމަށް އިޓަލީ ސަރުކާރުން ފޮނުވާ ހާއްސަ ފަންނީ މާހިރުންގެ ޓީމެއް ވަރަށް އަވަހަށް ރާއްޖެ އަންނާނެކަމަށް ސަރުކާރުގެ އިސް ތަރުޖަމާނު މުހައްމަދު ހުސެއިން ޝަރީފް (މުންދު) ވިދާޅުވެއްޖެ އެވެ.
ވ.އަތޮޅަށް ޑައިވިނަށް ގޮސް އުޅެނިކޮށް ގެއްލުނު ހަތަރު މީހުން ހޯދުމަށް އެމްއެންޑީއެފުން ފުރަތަމަ ޑައިވްކޮށްފައިވަނީ އިއްޔެ އެވެ. އަދި ދެވަނަ ޑައިވްއަށް ތައްޔާރުވެ މިއަދު ހެނދުނު 10:30 ހާއިރު އޮޕަރޭޝަން ވަނީ ފަށާފަ އެވެ.
“އެމްއެމްޓީވީ”އަށް މައުލޫމާތު ދެއްވަމުން ތަރުޖަމާނު ވިދާޅުވީ އިއްޔެ ދިވެހި ސިފައިން އޮޕަރޭޝަން ކުރިއަށްގެންގޮސްފައިވަނީ ވަރަށް އޮއިބާރު ވަގުތެއްގައިކަމަށެވެ.
“އިއްޔެގެ ޑައިވުން ހޯދުނުގެ ކުރިއެރުންތަކުގެ މައްޗަށް ބަލާ މިއަދުގެ ޑައިވް ކުރިއަށް ގެންދާނީ އެބޭފުޅުން،”. އިސް ތަރުޖަމާން ވިދާޅުވި އެވެ.
މި އޮޕަރޭޝަނަށް އިޓަލީ، އޮސްޓްރޭލިޔާގެ އިތުރުން އިނގިރޭސިވިލާތުގެ ފަންނީ އެހީތެރިކަން ލިބެމުންދާކަމަށާއި އަދި ވަރަށް އަވަހަށް އިޓަލީ ސަރުކާރުން ފޮނުވާ މާހިރުންގެ ޓީމެއް އޮޕަރޭޝަނާ ގުޅެނެކަމަށް ވިދާޅުވި އެވެ. އަދި އެކަމަށް ނިންމަން ޖެހޭ އެންމެހާ އިންތިޒާމްތައް ނިންމައި ކަންކަން މިހާރު ފައިނަލްވެފައިވާ ކަމަށް ވެސް ވިދާޅުވި އެވެ.
މި ހާދިސާއާ ގުޅޭ ސީރިއަސް މައްސަލަތަކެއް ބަލާތީ އެ މީހުން ޑައިވަށް ގެންދިޔަ ސަފާރީ ‘އެމްވީ ޑޫކް އޮފް ޔޯކް’ގެ އޮޕަރޭޓިން ހުއްދަ ޓޫރިޒަމް މިނިސްޓްރީން މިހާރު ވަނީ ހިފަހައްޓައިފަ އެވެ.
ވ. އަލިމަތީ ކައިރީ ކަނޑު އަޑީ ހޮހޮޅައިގައި ގެއްލުނު ހަތަރު އިޓަލީ ޑައިވަރުންގެ ހަށިގަނޑު ހޯދުމަށް ހުކުރު ދުވަހު ހިންގި އޮޕަރޭޝަނުގައި ހޮހޮޅައިގެ ތިން ޗެމްބަރުގެ ތެރެއިން ދެ ޗެމްބަރު ބެލި ނަމަވެސް އެކަކު ވެސް ފެނިފައި ނުވާ ކަމަށް އިޓަލީ ޚާރިޖީ ވުޒާރާއިން ވަނީ ބުނެފަ އެވެ.
ވ. އަތޮޅަށް ޑައިވިނަށް ގޮސް އުޅެނިކޮށް އިޓަލީވިލާތަށް ނިސްބަތްވާ ފަސް ޑައިވަރުން ގެއްލުނުކަމުގެ ރިޕޯޓް އެމްއެންޑީއެފް ކޯސްޓްގާޑު، މެރިޓައިމް ރެސްކިޔު ކޯޑިނޭޝަން ސެންޓަރު– އެމްއާރުސީސީއަށް ލިބިފައިވަނީ ބުރާސްފަތިދުވަހުގެ މެންދުރު 13:45 ހާއިރެވެ. އެ މައުލޫމާތު ލިބުމާއެކު އެ މީހުން ހޯދުމުގެ މަސައްކަތް ކަނޑާއި ވައިގެ މަގުން އެމްއެންޑީއެފްއިން ފަށާފައިވާކަމަށާއި މި މަސައްކަތުގައި ސަފާރީއާއި، ވ.އަތޮޅު ޕޮލިސް ސްޓޭޝަނުގެ އިތުރުން އަލިމަތާ ރިސޯޓުގެ އެހީތެރިކަން ލިބެމުންދާކަމަށް އެމްއެންޑީއެފްއިން ބުންޏެވެ.
އެކެއްގެ ހަށިގަނޑު ފެނިފައިވަނީ، އެމީހުން ހޯދުމުގެ މަސައްކަތުގައި ހަރަކާތްތެރިވި ސަފާރީގެ ޑައިވަރުންނަށް، ބުރާސްފަތި ދުވަހުގެ 18:13 ހާއިރު މޫދު އަޑިންނެވެ. މި ހަށިގަނޑު ފެނިފައިވަނީ ގާތްގަނޑަކަށް 60 މީޓަރުގެ އަޑިން ކޭވްއެއްގެ ތެރެއިން ކަމަށް އެމްއެންޑީއެފުން ހާމަކުރެ އެވެ.
މިހާރު ކުރިއަށް ދަނީ ބާކީ ތިބި ހަތަރު ޑައިވަރުން ހޯދުމުގެ މަސައްކަތެވެ.
ކިޔުންތެރިންގެ ހިޔާލު