ގަވާއިދާ ހިލާފަށް ހިންގަމުންދާ ވިޔަފާރިތައް ދެނެގަނެ ބަންދުކުރުމަށް ސަރުކާރުން ފެށި އޮޕަރޭޝަނުގެ ތެރެއިން މިހާތަނަށް 242 ތަނެއް ބަލައިފާސްކޮށް 102 ތަނެއް ބަންދުކޮށްފައިވާކަމަށް އިޤްތިޞާދީ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ، މި އޮޕަރޭޝަން ފެށިފަހުން ބިދޭސީން ނުގަވާއިދުން ހިންގާ ވިޔަފާރިތަކާ ގުޅިގެން 409 ޝަކުވާއެއް ލިބިފައިވާކަމަށާއި، މި އޮޕަރޭޝަނުގައި 242 ތަނެއް ބަލައިފާސްކޮށް، އެއިން 102 ވިޔަފާރިއެއް ބަންދުކުރި ކަމަށެވެ. ބަންދުކުރެވުނު ހުރިހާ ތަންތަނަކީ ގާނޫނާ ހިލާފަށް ހިންގާ ވިޔަފާރިތައް ނޫންކަން ފާހަގަކުރައްވަމުން ވަޒީރު ވިދާޅުވީ އެއިން ބައެއް ތަންތަނަށް އަލުން ވިޔަފާރިކުރަން ހުއްދަދޭއިރު، ކަނޑައެޅިގެން ގާނޫނާ ހިލާފަށް ހިންގަމުންދާ ވިޔަފާރިތައް އެކީ ބަންދުކުރާ ކަމަށެވެ.
ބަންދުކޮށްފައި މިބަލަނީ އޭގައި އިލީގަލް ޕްރެކްޓިސަސް ހުރިތޯ، އެގޮތަށް ބެލިއިރު އިލީގަލް ބިޒްނަސަސް ކަމުގައި ފާހަގަކުރެވުނު 57 ތަނެއް ބަންދުކޮށްފައި އެބަވޭ. ސެލޫން އެންޑް ސްޕާގެ ތެރޭގައި 45 ތަނެއް. އަދި އޭގެ އިތުރަށް ބަންދުކޮށްފައި އަލުން ހުޅުވަން ހުއްދަ ދިން، ނުގަވާއިދުން ހިންގި ވިޔަފާރިއެއް ނޫން ނަމަވެސް ރަނގަޅުކުރަންޖެހޭ ކަންކަން ރަނގަޅުކުރުމުން އަލުން ހުވަން ހުއްދަ ދިން 61 ތަނެއް ހުޅުވަން ހުއްދަދީފައިވޭ.
Advertisement
އިޤްތިޞާދީ ވަޒީރު ވިދާޅުވިއެވެ.
ބިދޭސީން ގަވާއިދާ ހިލާފަށް ހިންގާ ވިޔަފާރިތައް ދެނެގަނެ އެތަންތަން ބަންދުކުރުމުގެ ބޮޑު އޮޕަރޭޝަން އިގުތިސާދީ ތަރައްގީއާއި ބޭހާ ވުޒާރާއާއި ފުލުހުންގެ ހިދުމަތާއި ކަމާ ބެހޭ އެހެނިހެން އިދާރާތަކާއި މުއައްސަސާތައް ގުޅިގެން ފެށީ ނޮވެންބަރު 29 ވަނަ ދުވަހުއެވެ.
ކިޔުންތެރިންގެ ހިޔާލު