މިއަހަރުގެ ޖޫން މަހުން ފެށިގެން ސެޕްޓެމްބަރު މަހުގެ ނިޔަލަށް ރާއްޖެއަށް ވެހޭނެ ވާރޭގެ މިންވަރު އާންމު މިންގަނޑަށްވުރެ އިތުރުވާނެ ކަމަށް މޫސުމާ ބެހޭ ގައުމީ އިދާރާ، މެޓް އޮފީހުން ބުނެފިއެވެ.
މީޓިއޮރޮލޮޖިސްޓް ނަޞްރު އިސްމާޢީލް ވިދާޅުވީ ޖުމްލަ ވާރޭ ވެހޭ މިންވަރު އިތުރުވި ނަމަވެސް، ވާރޭ ވެހޭ ދުވަސްތަކުގެ އަދަދު މަދުވުން އެކަށީގެންވާ ކަމަށެވެ. މީގެ މާނައަކީ ވާރޭ ވެހޭ ވަގުތުތަކުގައި ވަރަށް ބޯކޮށް ވެހޭނެ ކަމެވެ.
މިހާރު ރާއްޖެ މި އޮތީ އިރުވައި މޫސުން ނިމި ހުޅަނގު މޫސުން ފެށޭ އިންތިގާލީ މަރުހަލާގައެވެ. އާންމުކޮށް ހުޅަނގު މޫސުން ފެށެނީ މެއި މަހުގެ ފުރަތަމަ ނުވަތަ ދެވަނަ ހަފުތާގައެވެ.
ހުޅަނގު މޫސުން އުފެދެނީ ދެކުނު ބިތުގައެވެ. އެހެންކަމުން، މޫސުން ބަދަލުވުމުގެ އަސަރު އެންމެ ފުރަތަމަ ކުރާނީ ރާއްޖޭގެ ދެކުނުގެ އަތޮޅުތަކަށެވެ. އޭގެ ފަހުން މެދުތެރެއާއި އުތުރުގެ އަތޮޅުތަކަށް މޫސުން ބަދަލުވާނެއެވެ.
ވިއްސާރަ އިތުރުވި ނަމަވެސް، ކުރިއަށް އޮތް މަސްތަކުގައި ރާއްޖޭގެ ހޫނުމިން ވެސް ހުންނާނީ އާންމު މިންގަނޑަށްވުރެ މަތީގައި ކަމަށް މެޓް އޮފީހުން ލަފާކުރެއެވެ. މެޓް އޮފީހުން މި މައުލޫމާތު ހާމަކޮށްފައިވަނީ މިދިޔަ އާދިއްތަ ދުވަހު ނެރުނު ސީޒަނަލް ފޯކާސްޓްގައެވެ. ރައްޔިތުން މޫސުމަށް ސަމާލުވުމަށާއި، ބޯކޮށް ވާރޭވެހި ފެންބޮޑުވެދާނެ ހާލަތްތަކަށް ތައްޔާރުވެ ތިބުމަށް ކަމާބެހޭ އިދާރާތަކުން އިލްތިމާސް ކުރެއެވެ.
ކިޔުންތެރިންގެ ހިޔާލު