ދައުލަތުގެ ބަޖެޓާ ގުޅިގެން އެއްވެސް ވާހަކައެއް ދައްކަން އެމްޑީޕީގެ މަޖިލިސް މެންބަރުން ލަދުގަންނަން ޖެހޭނެ ކަމަށް ހައްޖު ކޯޕަރޭޝަންގެ މެނޭޖިންގ ޑިރެކްޓަރު މުހައްމަދު ޝަކީލް ވިދާޅުވެއްޖެއެވެ.
ޝަކީލް މިފަދައިން ވިދާޅުވީ، އެމްޑީޕީގެ ވަގުތީ ޗެއާޕާސަން އަދި ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ މިއަހަރު ސަރުކާރުން ލިބެންޖެހޭ އެއްވެސް ފައިސާއެއް ޕާޓީއަށް ލިބިފައި ނުވާކަމަށް ބުނެ، ޕާޓީ ހިންގުމަށާއި އިންތިޚާބު ބާއްވާނެ އެއްވެސް ފައިސާއެއް ޕާޓީގައި ނެތް ކަމަށް ވިދާޅުވެ ދެއްކެވި ވާހަކައަށް އިޝާރާތްކުރައްވައި އެކްސްގައި ކުރެއްވި ޕޯސްޓެއްގައެވެ.
ޝަކީލް ވިދާޅުވީ ދައުލަތުގެ ބަޖެޓާއި ގުޅިގެން އެފަދަ ތުހުމަތެއް ކުރަން އެމްޑީޕީގެ މަޖިލިސް މެންބަރުން ލަދުގަންނަން ޖެހޭނެ ކަަމަށެވެ.
ދައުލަތުގެ ބަޖެޓުން އެމްޑީޕީއަށް ލިބެން ޖެހޭ ކޮން ފައިސާއެއް ނުލިބޭ ވާހަކަތޯ އައްސަވައި ޝަކީލް ވަނީ ޣަފޫރަށް ސުވާލެއް އަމާޒުކުރައްވާފައެވެ.
ދައުލަތުގެ ބަޖެޓުން އެމްޑީޕީއަށް ލިބެންޖެހޭ ކޮން ފައިސާއެއްގެ ވާހަކައެއްތޯ ގަޕޯ ތިޔަ ވިދާޅުވަނީ؟ ތިޔަ ވިދާޅުވާ ދައުލަތުގެ ބަޖެޓު ފާސްކުރަން ގަޕޯ އަދި އެމްޑީޕީގެ އެއްވެސް މަޖިލިސް މެންބަރަކު ވޭތުވެދިޔަ ތިން އަހަރު ވޯޓެއް ދިނިންތޯ؟ ދައުލަތުގެ ބަޖެޓާ ގުޅޭ އެއްވެސް ވާހަކައެއް…
— Mohamed Shakeel 🇲🇻 (@schakyyl) May 2, 2026
އެމްޑީޕީގައި ފައިސާ ނެތް ކަމަށް ބުނެ ކުއްލިގޮތަކަށް ޣަފޫރު ވަނީ އަންނަ މަހު ބާއްވަން އުޅޭ އެ ޕާޓީގެ ޗެއާޕާސަންގެ އިންތިޚާބު ފަސްކުރަން ހުށަހަޅާފައެވެ.
ކުއްލިގޮތަކަށް އެމްޑީޕީގެ ފައިސާތަކަށް ވީނުވީއެއް ނޭނގި ހުސްވެފައިވާތީ ގިނަ ބަޔަކު އަންނަނީ އެކަމާ ސުވާލު އުފައްދަމުންނެވެ.
ކިޔުންތެރިންގެ ހިޔާލު