އިލެކްޝަންސް ކޮމިޝަނުގެ ރައީސްކަމުގެ މަގާމަށް އެ ކޮމިޝަނުގެ މެންބަރު މުޙައްމަދު ޝަކީލު އައްޔަންކުރެއްވުމަށް ރައްޔިތުންގެ މަޖިލީހުގެ އަޣުލަބިއްޔަތުން މިއަދު ފާސްކޮށްފިއެވެ.
މިނިވަން މުއައްސަސާތަކާ ބެހޭ ކޮމިޓީން މުޙައްމަދު ޝަކީލު އިލެކްޝަންސް ކޮމިޝަނުގެ ރައީސްކަމަށް އައްޔަންކުރުމަށް ފާސްކުރީ އިތުރު އިންޓަވިއުއަކާ ނުލައެވެ. އެއީ އޭނާ ކޮމިޝަނުގެ މެންބަރުކަމަށް އައްޔަންކުރުމަށްޓަކައި ނިމުނު ހަފުތާގައި އިންޓަވިއުކޮށް، ތައުލީމާއި ތަޖުރިބާ ވަޒަންކޮށްފައިވާތީއެވެ. ކޮމިޓީގެ ނިންމުމާ އެއްގޮތަށް މިއަދު މަޖިލީހުގެ ތަޅުމުގައި ނެގުނު ވޯޓުގައި ބައިވެރިވެވަޑައިގެންނެވި މެންބަރުންގެ އަޣުލަބިއްޔަތުން ވަނީ އޭނާ އެ މަގާމަށް އައްޔަންކުރުމަށް ރުހުންދީފައެވެ.
މޯލްޑިވްސް ޙައްޖު ކޯޕަރޭޝަނުގެ މެނޭޖިން ޑިރެކްޓަރުގެ މަގާމުގައި ހުންނަވަނިކޮށް، ޝަކީލު އިލެކްޝަންސް ކޮމިޝަނުގެ މެންބަރުކަމަށް އައްޔަންކުރައްވާފައިވަނީ ފާއިތުވި ހަފުތާގެ ބުރާސްފަތި ދުވަހުއެވެ. އޭގެ ފަހުން ކޮމިޝަނުގެ ރައީސްކަމަށް އޭނާ އައްޔަންކުރުމާމެދު މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ ފޮނުއްވި ސިޓީފުޅު މަޖިލީހަށް އިއްވާފައިވަނީ އިއްޔެގެ ވަގުތެއްގައެވެ.
މުޙައްމަދު ޝަކީލަކީ ދައުލަތުގެ މުހިންމު މަގާމުތަކެއް ފުރުއްވާފައިވާ ތަޖުރިބާކާރު ބޭފުޅެކެވެ. އޭނާ ވަނީ ބޭންކް އޮފް މޯލްޑިވްސްގެ ޑިރެކްޓާ ޖެނެރަލްކަމާއި، އިލެކްޝަންސް ކޮމިޝަނުގެ ޑިރެކްޓާ ޖެނެރަލްކަން ކުރައްވާފައެވެ. މީގެ އިތުރުން 2014 ވަނަ އަހަރުން ފެށިގެން 2018 ވަނަ އަހަރުގެ މޭ މަހާ ހަމައަށް އެ ކޮމިޝަނުގެ މެންބަރުކަންވެސް ކުރެއްވިއެވެ. ކޮމިޝަނުގެ މެންބަރުކަމުން އިސްތިއުފާދެއްވުމަށްފަހު، ކުރީގެ ރައީސް އަބްދުﷲ ޔާމީނުގެ ސަރުކާރުގައި އިކޮނޮމިކް މިނިސްޓްރީގެ ސްޓޭޓް މިނިސްޓަރުގެ މަގާމުވެސް އޭނާ އަދާކުރެއްވިއެވެ.
ކިޔުންތެރިންގެ ހިޔާލު