ހުޅުމާލޭ ދެވަނަ ފިޔަވަހީގެ ހިޔާ އަދި ވިނަރެސް ބައެއް ޓަވަރުތަކުން ކަރަންޓު ކެނޑުނީ މަގު ހެދުމުގެ މަސައްކަތް ކުރަމުން ދަނިކޮށް ކޭބަލަކަށް ގެއްލުންވުމުން ކަމަށް ސްޓެލްކޯއިން ބުނެފިއެވެ.

ކަރަންޓްގެ ހިދުމަތް މެދުކެނޑިފައިވަނީ، ހިޔާ ޓަވަރު 5، 6، އަދި 7 ގެ އިތުރުން ވިނަރެސްގެ 10 ޓަވަރުންނެވެ. މީގެ އިތުރުން އަމާންދޯދި 12، 13، 14، 15، 16 އަދި އަމާން އުދަރެސް 5، އަދި 6 އިން ވެސް ވަނީ ކަރަންޓް ކެނޑިފައެވެ.

ސްޓެލްކޯ އިން ބުނީ ހުޅުމާލެ ދެވަނަ ފިޔަވަހީގެ ބައެއް ސަރަހައްދުތަކުން ކަރަންޓުގެ ހިދުމަތް މެދުކެނޑިފައިވަނީ، މަގު ހެދުމުގެ މަސައްކަތުގެ ތެރެއިން ކޮންނަނިކޮށް ހައި ވޯލްޓޭޖް ކޭބަލަކަށް ލިބުނު ގެއްލުމަކާ ގުޅިގެން ކަމަށެވެ. އަދި މިހާރު ދަނީ ކޭބަލް މަރާމާތުކޮށް، ވީ އެންމެ އަވަހަކަށް ހިދުމަތް އަލުން ފޯރުކޮށްދިނުމުގެ މަސައްކަތް ކުރަމުން ކަމަށް ވެސް އެ ކުންފުނިން ބުންޏެވެ.

މިމަހުގެ 12 ވަނަ ދުވަހުވެސް ހުޅުމާލެ ފޭސް ދޭއްގެ ބޮޑު ބަޔަކުން ކަރަންޓްގެ ހިދުމަތް ގިނަ ވަގުތުތަކަކަށް ވަނީ މެދުކެނޑިފަ އެވެ. އެފަހަރު ކަރަންޓް ކެނޑުމުގެ މައްސަލަ ދިމާވީ ދެވަނަ ފިޔަވައްސަށް ކަރަންޓް ދިނުމަށް ބޭނުންކުރާ ކޭބަލްތަކުގެ ތެރެއިން މައި ކޭބަލަކަށް ގެއްލުންވުމުންނެވެ.