ދިވެހިރާއްޖޭގެ ހައިކޯޓުގެ އިސްފަނޑިޔާރުގެ މަގާމަށް، މިހާރު އެ ކޯޓުގެ ހިންގުމާ ހަވާލުވެވަޑައިގެން ހުންނެވި ފަނޑިޔާރު އަބްދުﷲ ޖަމީލް މޫސާ އައްޔަންކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން މިއަދު ނިންމައިފިއެވެ.
މިއަދު ބޭއްވި ޖޭއެސްސީގެ ބައްދަލުވުމުގައި އެ ނިންމުން ނިންމާފައިވާކަން އެ ކޮމިޝަނުގެ މެންބަރަކު ކަށަވަރުކޮށްދިނެވެ.
ހައިކޯޓުގެ އިސް ފަނޑިޔާރުގެ މަގާމު ހުސްވީ، ކުރިން އެ މަގާމުގައި ހުންނެވި ފަނޑިޔާރު ޙުސައިން ޝަހީދު ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުގެ މަގާމަށް އައްޔަންކުރެއްވުމާ ގުޅިގެންނެވެ.
މި މަގާމަށް ކުރިމަތިލެއްވުމަށް ހުޅުވާލި ފުރުސަތުގައި ތިން ބޭފުޅަކު ކުރިމަތިލެއްވިއެވެ. އެއީ ފަނޑިޔާރު އަބްދުﷲ ޖަމީލް މޫސާ އާއި ފަނޑިޔާރު މުޙައްމަދު ޝަނީޒް އަބްދުﷲ އާއި ފަނޑިޔާރު އަބްދުއްރައޫފް އިބްރާހީމެވެ.
ފަނޑިޔާރު އަބްދުﷲ ޖަމީލް މޫސާއަކީ ކުލިއްޔަތުއް ދިރާސާތުލް އިސްލާމިއްޔާއިން ބެޗްލަރ އޮފް ޝަރީޢާ އެންޑް ލޯ (އޮނާސް) ހާސިލުކުރައްވާފައިވާ ބޭފުޅެކެވެ. އޭނާގެ ފަނޑިޔާރުކަމުގެ ދާއިރާގައި 15 އަހަރުގެ ތަޖުރިބާ އެބަހުއްޓެވެ.
2009 ވަނަ އަހަރު ފަނޑިޔާރުކަމުގެ މަސައްކަތް ފެއްޓެވީ ލ. ދަނބިދޫ ކޯޓުގެ މެޖިސްޓްރޭޓެއްގެ ގޮތުގައެވެ. އެއަށްފަހު 2009 އިން 2019 އަށް ސިވިލް ކޯޓުގެ ފަނޑިޔާރުގެ މަގާމު އަދާކުރެއްވިއެވެ.
ސިވިލް ކޯޓުން ވަކިވެވަޑައިގަތުމަށްފަހު ގާނޫނީ ވަކީލެއްގެ ގޮތުގައި 2015 ވަނަ އަހަރު ފަނޑިޔާރުކަމަށް އައްޔަންކުރެއްވުމާ ހަމައަށް މަސައްކަތްކުރެއްވިއެވެ.
ކިޔުންތެރިންގެ ހިޔާލު