ހުޅުމާލޭގައި 2019 ވަނަ އަހަރު ޓެކްސީ ޑްރައިވަރު ގާސިމް ހަސަންއަށް ތޫނު އެއްޗަކުން ހަމަލާދީ އަނިޔާވެރި ގޮތަކަށް މަރާލި މައްސަލައިގައި، ޅ. ހިންނަވަރު، ބޮޑުހިޔާގެ، އަދުހަމް މުހައްމަދު މަރަން ކްރިމިނަލް ކޯޓުން އިއްވި ހުކުމް ދިވެހިރާއްޖޭގެ ހައިކޯޓުން މިއަދު ދަމަހައްޓައިފިއެވެ.
އދ. މާމިގިލީ، އުމުރުން 59 އަހަރުގެ ގާސިމް ހަސަންގެ ކަރަށް ވަޅި ޖަހައި މަރާލާފައި އޮއްވައި ފެނުނީ 4 ޑިސެމްބަރު 2019 ވަނަ ދުވަހުގެ ރޭގައެވެ. އޭނާ މަރާލާފައި އޮއްވައި ފެނުނީ ހުޅުމާލޭގައި އާންމުކޮށް މީހުން ދިރިނޫޅޭ އަނދިރި ސަރަހައްދެއްގައި އޮންނަ ރީތިގަސްމަގުންނެވެ. ދައުލަތުން ކޯޓުގައި ބުނެފައިވާ ގޮތުގައި އަދުހަމް މި އަމަލު ހިންގާފައިވަނީ ގާސިމްގެ އަތުން ފޭރެން އުޅުމުގެ ތެރޭގައެވެ.
މި މައްސަލައިގައި ދައުލަތުން އަދުހަމްގެ މައްޗަށް އުފުލީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ. ފުރަތަމަ އެ ދައުވާއަށް އެއްބަސްވުމަށްފަހު، ފަހުން އަދުހަމް ބުނެފައިވަނީ ހަމަލާ ދެވުނީ މަސްތުވެގެން ހުރި ވަގުތެއްގައި ގަސްދެއް ނެތި ކަމަށެވެ. ނަމަވެސް، 16 އޭޕްރީލް 2023 ވަނަ ދުވަހު ކްރިމިނަލް ކޯޓުން އޭނާގެ މައްޗަށް މަރުގެ ހުކުމް އިއްވީ، ގާސިމްގެ ވާރިސުންގެ ގޮތުގައި ތިބި އޭނާގެ ފަސް ދަރިންވެސް އަދުހަމްގެ ކިބައިން މަރަށް މަރު ހިފުމަށް އެދިފައިވާތީއެވެ.
މަރުގެ ހުކުމްތައް ކަށަވަރުކުރުމަށް ދައުލަތުން މަތީ ކޯޓަށް ހުށަހަޅަންޖެހޭ އުސޫލުގެ ދަށުން ހައިކޯޓަށް މައްސަލަ ހުށަހެޅުމުން، މައްސަލަ ބެއްލެވި ބެންޗުގެ ރިޔާސަތުގައި އިންނެވި ފަނޑިޔާރު ދީބާނާޒް ފަހުމީ ވިދާޅުވީ ގާސިމް މަރާލުމުގެ ނިޔަތް އޮތް ކަމަށް ކްރިމިނަލް ކޯޓުން ކަނޑައެޅި ކަނޑައެޅުން ރަނގަޅު ކަމަށެވެ. އިންސާނެއްގެ މަސްގަނޑު ފަސޭހައިން ކަފައިލެވޭ ފަދަ ވަޅިއެއް ގަނެ، ކަރަށް ހަމަލާދިނުމަކީ މީހަކު މަރާލުމުގެ ފުރުސަތު ބޮޑު ކަމެއްކަން ސާބިތުވާކަމަށް ފަނޑިޔާރުން ވަނީ ފާހަގަކުރައްވާފައެވެ. މި ރައުޔަށް ބެންޗުގައި ދެން ތިއްބެވި އިސް ފަނޑިޔާރު ޖަމީލް މޫސާ އާއި ފަނޑިޔާރު ހުސައިން މަޒީދު ވެސް ވަނީ ތާއީދުކުރައްވާފައެވެ.
ކިޔުންތެރިންގެ ހިޔާލު