ސީލައިފް ގްލޯބަލް ކުންފުނީގެ މެނޭޖިން ޑިރެކްޓަރު އަޙްމަދު މޫސާ (އައްމަޓީ) ގެ މައްޗަށް ދައުލަތުން އުފުލި ޚިޔާނާތުގެ ދައުވާތައް ސާބިތުނުވާކަމަށް ކްރިމިނަލް ކޯޓުން ކުރި ޙުކުމާ ގުޅިގެން ހައިކޯޓުގައި ކުރިއަށްދާ އިސްތިއުނާފީ މައްސަލައިގެ މިއަދުގެ އަޑުއެހުން ކެންސަލްވެއްޖެއެވެ.
ގިނަ ބައެއްގެ އަތުން ފައިސާ ނެގުމަށްފަހު ފްލެޓް ހަވާލުނުކުރި މައްސަލައިގައި އައްމަޓީގެ މައްޗަށް އުފުލި ދައުވާތައް ސާބިތުނުވާކަމަށް ކްރިމިނަލް ކޯޓުން ނިންމުމާ ގުޅިގެން، ދައުލަތުން އެ މައްސަލަ ހައިކޯޓުގައި އިސްތިއުނާފުކުރީއެވެ. މިއަދު މެންދުރުފަހަށް ތާވަލުކުރި މި މައްސަލައިގެ އަޑުއެހުން ކެންސަލްވި ސަބަބެއް ހައިކޯޓުން ހާމަކޮށްފައެއް ނުވެއެވެ. މީގެ ކުރިން ބާއްވަން ތާވަލުކުރި އަޑުއެހުންވެސް ވަނީ ކެންސަލްވެފައެވެ. ނަމަވެސް، މި މައްސަލައިގެ ފުރަތަމަ އަޑުއެހުން ހައިކޯޓުން ވަނީ ލައިވްކޮށް ގެނެސްދީފައެވެ. އަދި އެ ދުވަހުގެ އަޑުއެހުން ތިން ގަޑިއިރަށްވުރެ ގިނައިރަށް ކުރިއަށް ދިޔަކަން ފާހަގަކުރެވެއެވެ.
ހައިކޯޓުގައި ބޭއްވުނު ފުރަތަމަ އަޑުއެހުމުގައި އައްމަޓީ ވަނީ ދައުލަތުގެ ވަކީލުންނަށް ވަރަށް ބޮޑަށް ފާޑުކިޔާފައެވެ. އޭނާ ބުނެފައިވަނީ ޝަރީޢަތުގެ މާލަމުގައި ވާހަކަދައްކަންވާނީ ކަން ހިނގާފައިވާ ގޮތަށް އަދި ލިޔެކިޔުންތަކުގައިވާ ގޮތަށް ކަމަށެވެ. އަދި މަކަރާއި ހީލަތް ހަދައިގެންނާއި އޮޅުވާލައިގެން ދޮގުހަދައިގެން ވާހަކަދެއްކުމުގެ ޖާގަ ނޯންނާނެކަމަށް އޭނާ ވަނީ ޝަރީޢަތުގެ މަޖިލީހުގައި ބުނެފައެވެ.
މި މައްސަލައިގެ އިސްތިއުނާފު ފެށުނުއިރުއްސުރެ، އައްމަޓީގެ ޕާސްޕޯޓް އޮތީ ހައިކޯޓުގެ އަމުރެއްގެ ދަށުން ހިފަހައްޓާފައެވެ. ހައިކޯޓުގައި މި މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވަނީ އިސްފަނޑިޔާރު ޢަބްދުﷲ ޖަމީލް މޫސާ، މުޙައްމަދު ޝަނީޒު ޢަބްދުﷲ އަދި ޢަބްދުލްމާނިއު ޙުސައިންއެވެ. މައްސަލައިގެ ރިޔާސަތު ބަލަހައްޓަވަނީ ފަނޑިޔާރު ޝަނީޒްއެވެ. ފުރަތަމަ ބޭއްވުނު ޝަރީޢަތުގެ މަޖިލީހުގައި ފަނޑިޔާރުންގެ ބެންޗުން ވަނީ ދައުލަތާ ގިނަ ސުވާލުތަކެއް ކުރިމަތިކުރުވާފައެވެ.
ކިޔުންތެރިންގެ ހިޔާލު