ދިވެހީންގެ އުފެއްދުންތެރިކަމުގެ މައުރަޒު 2026ގައި ބައިވެރިވުމަށް މިހާތަނަށް 80 އެޕްލިކޭޝަން ލިބިފައިވާކަމަށް ބިޒްނަސް ސެންޓަރ ކޯޕަރޭޝަން، ބީސީސީން ބުނެފިއެވެ.
ދިވެހީންގެ އުފެއްދުންތެރިކަމުގެ މަޢުރަޒަކީ، ރާއްޖޭގެ އެކި ކަންކޮޅުތަކުގައި ތިބި އަތްތެރި މަސައްކަތްތެރިންނާއި، ކުދި އަދި މެދު ފަންތީގެ ވިޔަފާރިތަކާއި، ޑިޖިޓަލް އުފެއްދުންތެރިންގެ އިތުރުން އައު އީޖާދުތައް ކުރާ ފަރާތްތަކަށް އެ ފަރާތްތަކުގެ މަސައްކަތްތައް ދައްކާލުމަށް ބާއްވާ މަޢުރަޒެކެވެ. ބީސީސީން ބުނީ އުފެއްދުންޔެރިކަމުގެ މައުރަޒަށް މިދިޔަ އަހަރުވެސް ބޮޑު ތަރުހީބެއް ލިބުނުކަމަށެވެ. އެގޮތުން މިދިޔަ އަހަރުގެ މައުރަޒުގައި 250 ފަރާތަކުން 2500އަށްވުރެ ގިނަ އުފެއްދުން ބައިވެރިކޮށްފައިވާކަމަށް ބީސީސީން ބުންޏެވެ. އަދި މިދިޔަ އަހަރެކޭވެސް އެއްގޮތަށް މިއަހަރުގެ މައުރަޒަށްވެސް ބޮޑު ތަރުހީބެއް ލިބޭނެ ކަމަށް އުއްމީދު ކުރައްވާ ކަމަށާއި، މިހާތަނަށް 80 އެޕްލިކޭޝަން ލިބިފައިވާ ކަމަށް ބީސީސީން ބުންޏެވެ.
މިދިޔަ އަހަރުގެ މައުރަޒަށް ބަލާއިރު ޖުމްލަ ގޮތެއްގައި 250 ފަރާތަކުން 2500އަށްވުރެ ގިނަ އުފެއްދުންތައް ވަނީ ބައިވެރިކޮށްފައެވެ. މިއަހަރުގެ މައުރަޒުގައިވެސް ސަރުކާރުގެ ކުންފުނިތަކާއި، ޖަމިއްޔާ ޖަމާޢަތްތަކާއި، ތަޢުލީމުދޭ އިދާރާތަކަށްވެސް ބައިވެރި ވެވޭނެއެވެ. އަދި މިދިޔަ އަހަރާ ޚިލާފަށް މިއަހަރުގެ މައުރަޒުގައި 13 އަހަރުން މަތީގެ ކޮންމެ މީހަކަށްވެސް ބައިވެރި ވެވޭނެއެވެ.
މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، މި އަހަރަކީ “އުފެއްދުންތެރިކަމުގެ އަހަރު”ގެ ގޮތުގައި ކަނޑައަޅުއްވައި އެކަން އިޢުލާނު ކުރައްވާފައެވެ. އެހެންކަމުން ދިވެހީންގެ އުފެއްދުންތެރިކަމުގެ މަޢުރަޒު 2026 ވާނީ، ދިވެހި އުފެއްދުންތެރިންނާއި ފަންނުވެރިންނަށް ހުޅުވިގެންދާނެ މުހިންމު ފުރުޞަތަކަށް ކަމަށް ބީސީސީން ބުންޏެވެ.
މިއަހަރުގެ މައުރަޒު ކުރިއަށްދާނީ، އޮކްޓޯބަރު މަހުގެ 23 އިން 31އަށް ހުޅުމާލެ ސެންޓްރަލް ޕާކުގައެވެ.
ކިޔުންތެރިންގެ ހިޔާލު