މެދުއިރުމަތީގައި މިހާރު ހިނގަމުންދާ ހަނގުރާމައިގައި އެއްވެސް ގައުމަކަށް ހަމަލާދިނުމަށް ނުވަތަ ހަނގުރާމައާ ގުޅޭ އެއްވެސް ކަމަކަށް ރާއްޖޭގެ ވައިގެ ސަރަހައްދުން އެންމެ އިންޗިއެއް ވެސް ނުދޭނެ ކަމުގެ ޔަގީންކަން ޑިފެންސް މިނިސްޓަރު މުހައްމަދު ޣައްސާން މައުމޫން ދެއްވައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ޣައްސާން ވިދާޅުވީ ހަނގުރާމައިގެ އެއްވެސް ބޭނުމަކަށް އެއްވެސް ތަނެއް އެއްވެސް ގައުމަކަށް ނުދޭން ސަރުކާރުން ނިންމާފައިވާ ކަމަށެވެ.
މި ހަނގުރާމައިގެ ސަބަބުން ރާއްޖެއަށް އޮތް ނުރައްކާ ސަރުކާރުން ދަނީ މެދުނުކެނޑި ވަޒަންކުރަމުން ކަމަށާއި މިހާތަނަށް ބެލި ބެލުމުން ރާއްޖެއަށް އަސްކަރީ ގޮތުން އެއްވެސް ނުރައްކަލެއް އޮތް ކަމަށް ނުފެންނަ ކަމަށް ޣައްސާން ވިދާޅުވިއެވެ.
“އިރާދަކުރެއްވިއްޔާ މި ހަނގުރާމައިގެ ސަބަބުން ދިވެހިރާއްޖެއަކަށް އަސްކަރީ ގޮތުން އެއްވެސް ނުރައްކަލެއް އޮތް ކަމަކަށް އަޅުގަނޑުމެންނަކަށް މިދަނޑިވަޅަކު ނުފެނޭ,” މިނިސްޓަރު ޣައްސާން ވިދާޅުވިއެވެ.
ރާއްޖޭގެ އެއްވެސް ސަރަހައްދެއްގައި ހަނގުރާމަވެރި އަމަލެއް ހިންގުމަށް ފުރުސަތު ނުދޭނެ ކަމުގެ ފުރިހަމަ ޔަގީންކަން ޑިފެންސް މިނިސްޓަރު ވަނީ ރައްޔިތުންނަށް ދެއްވާފައެވެ.
ކިޔުންތެރިންގެ ހިޔާލު