ރާއްޖޭގެ ހުރިހާ އަތޮޅަކުން އެސްޓީއޯގެ ރޭޓުގައި ތެޔޮ ލިބޭނެ ގޮތް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ސިޔާސަތުގެ ދަށުން، ހދ. ހަނިމާދޫގައި ގާއިމުކުރި ފިއުލް ޝެޑުން ތެޔޮ ވިއްކަން ފަށައިފިއެވެ.
އެސްޓީއޯގެ ސަބްސިޑަރީ ކުންފުނި، ފިއުލް ސަޕްލައި މޯލްޑިވްސް (އެފްއެސްއެމް) އިން ހަނިމާދޫގައި ހުޅުވި މި ފިއުލް ޝެޑުން ކޮންމެ ދުވަހެއްގެ ހެނދުނު 10:00 އިން ހަވީރު 17:00 އަށް، އަދި ރޭގަނޑު 20:30 އިން މެންދަމު 00:00 އަށް ޚިދުމަތް ދޭނެއެވެ. މިއީ މާލެއާ އެއް އަގަކަށް ރާއްޖޭގެ އެކި ސަރަހައްދުތަކުން ތެޔޮ ފޯރުކޮށްދިނުމަށް ސަރުކާރުން ފަށާފައިވާ މުހިންމު މަޝްރޫޢުގެ ބައެކެވެ.
ބޮޑު ތިލަދުންމަތީގެ ތިން ރަށަކުން މި ޚިދުމަތް ދިނުމަށް ނިންމާފައިވާއިރު، ހއ. އިހަވަންދޫގައި ގާއިމުކުރި ޝެޑުން މިދިޔަ ފެބްރުއަރީ މަހުގެ 25 ވަނަ ދުވަހުން ފެށިގެން އަންނަނީ ޚިދުމަތް ދެމުންނެވެ. ހަނިމާދޫގެ އިތުރުން ދެން މި ޚިދުމަތް ފެށުމަށް ހަމަޖެހިފައިވަނީ ށ. މިލަންދޫގައެވެ. މި މަޝްރޫޢުގެ ދަށުން އެންމެ ފުރަތަމަ ޝެޑް ހުޅުވާފައިވަނީ ރ. ދުވާފަރުގައެވެ.
ރާއްޖޭގެ ކޮންމެ އަތޮޅެއްގައި ތެޔޮ ރައްކާކުރެވޭނެ ނިޒާމު ގާއިމުކުރުމުގެ ބޮޑު މަޝްރޫޢު ރައީސް ޑރ. މުޙައްމަދު މުޢިއްޒު އިފްތިތާޙްކޮށްދެއްވީ 7 ނޮވެމްބަރު 2024 ގައެވެ. މި މަޝްރޫޢުގެ މައިގަނޑު މަޤްޞަދަކީ މަސްވެރިންނަށާއި އާންމު ރައްޔިތުންނަށް އެސްޓީއޯގެ ކޮންޓްރޯލް ރޭޓުގައި، ފަސޭހަކަމާއެކު ތެޔޮ ލިބޭނެ އިންތިޒާމު މުޅި ރާއްޖޭގައި ގާއިމުކުރުމެވެ.
މި އައު ޚިދުމަތާއެކު، ހަނިމާދޫގެ ރައްޔިތުންނަށާއި އެ ސަރަހައްދުގައި ހަރަކާތްތެރިވާ އުޅަނދުފަހަރަށް ތެލުގެ ޚަރަދު ކުޑަވެ، އިޤްތިޞާދީ ގޮތުން ބޮޑެތި ލުއިތަކެއް ލިބިގެންދާނެ ކަމަށް ބެލެވެއެވެ.
ކިޔުންތެރިންގެ ހިޔާލު