މޮބައިލް ވޯލްޑް ކޮންގްރެސްގައި ދިރާގަށް އޫކްލާގެ 3 އެވޯޑެއް ލިބިއްޖެއެވެ.
މި އެވޯޑުތައް ދިރާގާ ހަވާލުކޮށްފައިވަނީ ސްޕެއިންގެ ބާސެލޯނާގައި ބޭއްވި، ޓެލެކޮމިއުނިކޭޝަންސްގެ ދާއިރާގެެ ދުނިޔޭގެ އެންމެ ބޮޑު ހަރަކާތް ކަމަށްވާ މޮބައިލް ވޯލްޑް ކޮންގްރެސްގައެވެ.
ދިރާގަށް ލިބުނު އެވޯޑުތަކުގެ ތެރޭގައި އޫކްލާ ސްޕީޑް ޓެސްޓްގެ ފަރާތުން ދޭ ‘ފާސްޓެސްޓް 5ޖީ ނެޓްވޯކް’، ‘ބެސްޓް 5ޖީ ނެޓްވޯކް’ އަދި ‘ބެސްޓް 5ޖީ ގޭމިންގ އެކްސްޕީރިއަންސް’ އެވޯޑު Q1-Q2 2025 ވަނީ ލިބިފައެވެ.
ދިރާގުން ބުނީ މި ކާމިޔާބީން ދައްކުވައިދެނީ ދިރާގުގެ ހިދުމަތްތައް ދުނިޔޭގެ ފެންވަރުގައި ފޯރުކޮށްދިނުމަށް އަދި ޑިޖިޓަލް ރާއްޖެ ބިނާކުރުމަށް ދިރާގުން ކުރަމުންދާ މަސައްކަތްތަކުގެ ނަތީޖާކަމަށެވެ. މި ގޮތުން، 2019 އަހަރު، ދިރާގަކީ ސައުތު އޭޝިއާ އަދި، ރާއްޖޭގައި 5ޖީ ހިދުމަތް ތައާރަފްކުރި ފުރަތަމަ ސަރވިސް ޕްރޮވައިޑަރއެވެ. މިހާރު ދިރާގުން ވަނީ ރާއްޖޭގެ އާބާދީގެ 73% އަށް ދިރާގުގެ ހަލުއި 5ޖީ ނެޓްވޯކް ފޯރުކޮށްދީފައިކަމަށް ދިރާގުން ބުނެއެވެ.
ދިރާގުން ވަނީ އޫކްލާއިން ދޭ ‘މޯލްޑިވްސް ފާސްޓަސްޓް މޯބައިލް ނެޓްވޯކް’ ވިދިވިދިގެން ތިން އަހަރު ހޯދައި އަދި ‘ފާސްޓަސްޓް 5ޖީ ނެޓްވޯކް’ ދެ އަހަރު ހޯދައި ރާއްޖޭގެ އެންމެ ހަލުއި ނެޓްވޯކްގެ ގޮތުގައި ވެގެން ގޮސްފައެވެ.
މުއާސަލާތީ ހިދުމަތްތަކާއި ޑިޖިޓަލް ސޮލިއުޝަންސް ފޯރުކޮށްދިނުމުގައި ރާއްޖޭގެ އެންމެ ކުރީގައި އޮތް ކުންފުނި ކަމުގައިވާ ދިރާގުން ދަނީ ޓެކްނޮލޮޖީއަށް އަންނަ ބަދަލުތަކާ އެއް ހަމައެއްގައި ތިބުމަށް ކަސްޓަމަރުން ބާރުވެރިކުރުމަށް އެންމެ ފަހުގެ ހިދުމަތްތައް ދުނިޔޭގެ ފެންވަރުގައި ފޯރުކޮށްދެމުންނެވެ.
ކިޔުންތެރިންގެ ހިޔާލު