ކަނޑުމަގުން ރާއްޖެއަށް އެތެރެކުރަން އުޅުނު 36.43 ކިލޯގެ ބަރުދަންހުރި ހަޝީޝް އޮއިލް އަތުލައިގަނެފައިވާކަމަށް މޯލްޑިވްސް ކަސްޓަމްސް ސާވިސްއިން ބުނެފިއެވެ.

ކަސްޓަމްސްއިން ހާމަކުރި ގޮތުގައި މިތަކެތި އަތުލައިގަތީ މާލޭ ވިޔަފާރި ބަނދަރުން، ފެބްރުއަރީ 12 2024 ވަނަ ދުވަހުއެވެ. މި ތަކެތި ހުރީ ކަނޑުމަގުން ރާއްޖެއަށް ގެނައި މުދާ ޝިޕްމެންޓެއްގެ ތެރޭގައެވެ.

ކަސްޓަމްސްއިން ބުނި ގޮތުގައި ފެބްރުއަރީ 12 2026 ވަނަ ދުވަހު އެ ޝިޕްމެންޓު ބަލައިފާސްކުރުމުގެ ތެރޭގައި މަސްތުވާތަކެތިކަމަށް ޝައްކުކުރެވޭ އެއްޗެހިތަކެއް ފެނުމުން އެ ތަކެތިވަނީ ޓެސްޓުކޮށްފައެވެ. ފުރަތަމަ މަރުހަލާގެ ޓެސްޓުތަކުން އެ ތަކެއްޗަކީ ހަޝީޝް އޮއިލްކަންވަނީ ކަށަވަރުކުރެވިފައެވެ.

ކަސްޓަމްސް އިން ބުނެފައިވަނީ މި ޝިޕްމެންޓުން އަތުލައިގަނެވުނު ހަޝިޝް އޮއިލްގެ ބަރުދަނުގައި 36.43 ކިލޯ ހުންނާނެއެވެ. އަދި އެތަކެތީގެ މަގުމަތީ އަގު 29 މިލިއަން ރުފިޔާއަށް އަރާނެ ކަމުގައި އެ އިދާރާއިން ބުންޏެވެ.

ކަސްޓަމުން ބުނެފައިވަނީ އެ މައްސަލަ އިތުރަށް ތަހުގީގުކުރުމަށް ފުލުހުންގެ ހިދުމަތަށް ހުށަހަޅައި، އަތުލައިގަނެފައިވާ މަސްތުވަތަަކެތި އެ ހިދުމަތާ މިހާރު ހަވާލުކޮށްފައިވާ ކަމަށެވެ.