ސިނަމާލެ އާއި މާލޭ ހިޔާގެ ފްލެޓްތަކުގެ މައްސަލަ މާލޭ ސިޓީ ކައުންސިލަށް ހައްލުކޮށްދެވިފައިނުވާތީ، ސަރުކާރުން އެ މައްސަލަ ހައްލުކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ގަލޮޅު ރައްޔިތުންނާ ރޭ ބައްދަލުކުރައްވައި ވާހަކަފުޅުދައްކަވަމުން ރައީސް ވިދާޅުވީ އެމަނިކުފާނު މާލޭގެ މޭޔަރަކަށް ހުންނެވި އިރު، ސިނަމާލެ އާއި މާލޭ ހިޔާ ފްލެޓްތަކުގެ ހުރިހާ ޖޫރިމަނާއެއް މާފުކޮށްދެއްވާފައިވާ ކަމަށެވެ.

ރައީސް ވިދާޅުވީ ޖޫރިމަނާ މާފުކޮށްދީފައި ވަނިކޮށް ޖޫރިމަނާ ނުދައްކައިގެން ސިޓީ ކައުންސިލުން ނޯޓިސް ފޮނުވަން ނުޖެހޭނެ ކަމަށް އެމަނިކުފާނު ވިދާޅުވި އެވެ.

ރައީސް ވަނީ އެކަން ހިނގާފައި އޮތް ގޮތެއް ބަލަން މާލޭގެ ޑެޕިއުޓީ މޭޔަރު މުހައްމަދު އަރީޝްގެ އަރިހުގައި އެދިވަޑައިގެންފައެވެ.

“އެތަނުގެ ހާލަތާއި އެތަނުގައި މި ހުރި ހުރިހާ ކަމެއް، ލިފްޓުގެ މައްސަލަ، ފާހާނަތަކުން ފެން ފޭބުން ވިޔަސް، މިވެސް ސީދާ ކައުންސިލުން ބަލަހައްޓަން ޖެހޭ ތަނެއް، މެއިންޓެނަންސަކީ ކައުންސިލްގެ ޒިންމާއެއް، އެކަން އެ އޮތީ ނުކުރެވި. އެތަނަށް ދައްކަން ހުރި ފައިސާގެ ކަންތައް ވެސް، މިއީ ހަމަ ސީރިއަސް އިޝޫސްތައް،” ރައީސް ވިދާޅުވިއެވެ.