ވިލިމާލެ ޕޮލިސް ސްޓޭޝަންގެ ބެލުމުގެ ދަށުގައި ބަހައްޓާފައި ހުރި ގިނަ އަދަދެއްގެ ސިނގިރޭޓު ކާޓުންތައް ވަގަށް ނަގައިފިއެވެ.
ފުލުހުންގެ މީޑިއާ އޮފިޝަލް ވިދާޅުވީ އެފަދަ ކަމެއް ހިނގައިގެން އުޅޭ ކަމަށާއި އެކަމާ ގުޅިގެން އިތުރަށް ބަލަންޖެހޭ ކަންތައްތައް ބެލުމާއި ކަށަވަރުކުރަންޖެހޭ ކަންކަން ކުރިއަށްދާ ކަމަށެވެ.
އެނގިފައިވާގޮތުގައި ވިލިމާލެ ޕޮލިސް ސްޓޭޝަނުން ވަގަށް ނަގާފައިވަނީ މެންޗެސްޓާ ބްރޭންޑުގެ 31 ކާޓުން ސިނގިރޭޓެވެ. މި ސިނގިރޭޓުތަކަކީ ފުލުހުން ތިލަފުށިން ހޯދާފައިވާ ސިނގިރޭޓުތަކެއް ކަމަށް މައުލޫމާތު ލިބިފައިވެއެވެ. މި ސިނގިރޭޓު ތައް ވިލިމާލެ ޕޮލިސް ސްޓޭޝަން ގައި ބަހައްޓާފައި ހުރީ ފޮށިގަނޑެއްގެ ތެރޭގައެވެ.
މި ސިނގިރޭޓުތައް ގެއްލުނުކަން އެނގުނީ އެ ފޮށިގަނޑު ހުޅުވާފައި ހުރުމުން، ފުލުހުން އެ ފޮށިގަނޑު ބަލާ ފާސްކުރުމުންނެވެ.
އެ މައްސަލައާ ގުޅިގެން އެއްވެސް މީހަކު އަދި ހައްޔަރެއް ނުކުރެއެވެ.
އެމްޕީއެލްގެ ހުޅުމާލެ ބަނދަރުގައި ހުރި 13 މިލިއަން ސިނގިރޭޓް ކޮންޓެއިނަރާއެކު ވަގަށް ނެގި މައްސަލައެއް ވެސް ފުލުހުން އަންނަނީ ތަހުގީގު ކުރަމުންނެވެ.
އެ މައްސަލާގައި ބިޑެތި ބައެއް ވިޔަފާރިވެރިން ހިމެނޭހެން ގިނަ ބަޔަކު ވަނީ ހައްޔަރުކޮށްފައެވެ.
ކިޔުންތެރިންގެ ހިޔާލު