ޗައިނާއާއި އެމެރިކާއާ ދެމެދު ހިނގަމުންދާ ވިޔަފާރީގެ އަރާރުންތަކަށް ނިމުން ގެނައުމަށް ދެގައުމުން އެއްބަސްވެއްޖެއެވެ.
އެ ދެގައުމުން މިކަމަށް އެއްބަސްވީ، ޗައިނާގެ ރައީސް ޝީ ޖިންޕިންއާއި އެމެރިކާގެ ރައީސް ޑޮނަލްޑް ޓްރަމްޕާ ދެމެދު ދެކުނު ކޮރެއާގައި މިއަދު ބޭއްވި ބައްދަލުވުމުގައި ވާހަކަ ދެކެވި ކުރެވުނު މަޝްވަރާތަކުއެވެ.
ޗައިނާގެ ރައީސާއެކު ދެކެވުނު ވާހަކަތަކުގެ ނަތީޖާއަށް އިޝާރާތްކުރައްވައި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، ވާހަކަތަކުގެ ނަތީޖާ ވަރަށް ފޮނި ކަމަށާއި، ދެގައުމުގެ ދެމެދުގައި އުފެދިފައިވާ ވިޔަފާރީގެ “ހުރިހާ” މައްސަލަތަކަށް ހައްލު ހޯދުނު ކަމަށެވެ.
ޓްރަމްޕްވަނީ، ޗައިނާއިން އެމެރިކާއަށް އެތެރެކުރާ މުދަލުން ނަގަން ކަނޑައެޅި 57 އިންސައްތަ ޓެރިފް، 47 އިންސައްތައަށް ކުޑަކުރަން ނިންމަވާފައެވެ. އެއީ، ޗައިނާއިން ކުރަން އެއްބަސްވި ކަންކަމުގެ ބަދަލުގައެވެ.
އެމެރިކާގެ ރައީސް ޓްރަމްޕާއެކު ބޭއްވި ވާހަކަތަކަށް އިޝާރާތް ކުރައްވައި ޗައިނާގެ ރައީސް ޝީ ޖިންޕިން ވިދާޅުވީ، އެމެރިކާއާއި ޗައިނާއާ ދެމެދު އުފެދިފައިވާ އިގްތިސާދީ އަދި ވިޔަފާރީގެ މައްސަލަތަކަށް ދެގައުމުގެ ވަފުދުތަކުން ފުންކޮށް ވާހަކަ ދައްކައި ގޮތްތަކަކަށް އެއްބަސްވެވިއްޖެ ކަމަށެވެ.
ނަމަވެސް، ޚިލާފްތައް އަދިވެސް ވާހަކަ ދައްކައިގެން ކުޑަކުރަން ޗައިނާގެ ރައީސް އެދިވަޑައިގެންފައި ވެއެވެ.
ޗައިނާގެ ޒިންހުވާ ނޫހުން ބުނެފައިވަނީ، ބަދަލު ހިފުމުގެ ރޫހު އެއްފަރާތްކޮށް އެމެރިކާއާއި ޗައިނާއަށްވެސް ދެމެހެއްޓެނިވި މަންފާކުރާ ގޮތަށް މުސްތަގްބަލަށް ކަންކަން ރޭވުމުގެ މުހިންމުކަން ޗައިނާގެ ރައީސް ޝީ، އެމެރިކާގެ ރައީސަށް ދެންނެވި ކަމަށެވެ.
ކިޔުންތެރިންގެ ހިޔާލު