އދ. މަންދޫގެ ރައްޔިތުން ބޭނުންވާގޮތަށް ރަށުގެ ބަނދަރާއި ޖެޓީގެ މަސައްކަތް އަވަސްކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ މަންދޫގެ ރައްޔިތުންނާއެކު ބޭއްވެވި މަޝްވަރާ ބައްދަލުކުރެއްވުމުގައި ވާހަކަފުޅުދައްކަވަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އެމަނިކުފާނު މަންދޫއަށް ވެވަޑައިގެންނެވި އެންމެ މުހިންމު އެއް ވައުދަކީ ބަނދަރާއި ޖެޓީ ރަނގަޅު ފެންވަރަކަށް ތަރައްޤީކޮށްދެއްވުންކަމަށެވެ. އެހެންކަމުން އެ މަސައްކަތް ރައްޔިތުން ބޭނުންވާގޮތަށް ހިންގަވައިދެއްވާނެކަމަށާއި، އަމަލީ މަސައްކަތް ލަސްތަކެއް ނުވެ ފެށޭނެކަމުގެ ޔަޤީންކަން ރައީސް ވަނީ މަންދޫގެ ރައްޔިތުންނަށް ދެއްވާފައެވެ.
“ބަނދަރުގެ މައްސަލައާއި ޖެޓީއެއް ހެދުން އެއީ ރަައްޔިތުން އެންމެ ބޭނުންވާ އެއްކަންތައް. އެކަންކަން ފުއްދެވުމަށް ޚާއްސަ އިސްކަމެއްދޭނަން. އެމަޝްރޫޢުގެ އަމަލީ މަސައްކަތް ލަސްތަކެއްނުވެ ފެށޭނެ.” ރައީސް
ރައީސް ވިދާޅުވީ، މަންދޫ ސްކޫލަށް އޮތް ޖާގައިގެ މައްސަލަ ހައްލުކޮށްދެއްވުމަށްޓަކައި މިދަތުރުފުޅުގެ ތެރެއިން އެމްޓީސީސީއާ ހަވާލުކުރެވުނު ސްކޫލުގެ 12 ކްލާސްރޫމާއި މަލްޓިޕަރޕަސް ހޯލުގެ އަމަލީ މަސައްކަތް މިފެށޭ ނޮވެންބަރުމަހުގެ ތެރޭގައި ފެށޭނެކަމަށެވެ. އަދި 2027 ވަނަ އަހަރުގެ ދިރާސީ އަހަރުގެ ކިޔެވުން ފެށެން ވާއިރަށް އެތަން ބޭނުންކުރެވޭނެކަމަށް ރައީސް ވިދާޅުވިއެވެ.
“ސްކޫލް މަސައްކަތަކީވެސް އަޅުގަނޑުމެންގެ މުހިންމު ވައުދެއް. މި ޕްރޮޖެކްޓުވެސް ނުހުއްޓި ބާރަށް ގެންގޮސްދޭނެކަމުގެ ޔަޤީންކަން ރައްޔިތުންނަށް އަރުވަން. މި މަޝްރޫޢާއެކު ދަރިވަރުންނާ ބެލެނިވެރިންނަށްވެސް ބޮޑު ހިތްހަމަޖެހުމެއް ލިބޭނެ.” ރައީސް
މަންދޫ ރައްޔިތުންނާ ބައްދަލުކުރައްވާ ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ މަންދޫގައި އަމަލީ މަސައްކަތް ފެށި ކުޅިވަރުގެ މަޝްރޫޢުތަކަކީވެސް ޒުވާނުންނަށް އިތުރު ހިތްހަމަޖެހުމެއް ލިބިގެންދާނެ މަޝްރޫޢުތަކެއްކަމަށެވެ. މި ހުރިހާ މަޝްރޫޢުތަކެއްވެސް އަވަސް މިނެއްގައި ފުރިހަމަ ކުރުމަށް ކަމާއިގުޅުންހުރި މުއައްސަސާތަކާއި ކުންފުނިތަކުން ގުޅިގެން މަސައްކަތްކުރައްވާނެކަމަށް ރައީސް ވިދާޅުވިއެވެ.
މި ބައްދަލުކުރެއްވުމުގައި މަންދޫ ރައްޔިތުންގެ ފަރާތުން ހުށަހެޅި ކަންކަމުގެ ތެރޭގައި ލަފާފުރުމުގެ ދަތިކަން ހައްލުކޮށްދެއްވުމާއި، ބޯހިޔާވަހިކަމުގެ މައްސަލަ ހައްލުކޮށްދެއްވުމާއި، ސްކޫލު އެއްދަންފަޅިއަށް ބަދަލުކޮށްދިނުން ހިމެނެއެވެ. އަދި އާރްޓީއެލް ފެރީގެ ޚިދުމަތް އަވަހަށް ފެށުމާއި، ވިޔަފާރިއާއި އިޤްތިޞާދީ ހަރަކާތްތައް އިތުރުކުރުމާއި ލޯކަލް ޓޫރިޒަމަަށް އިތުރު ފުރުޞަތުތައް ފަހިކޮށްދިނުން ހިމެނެއެވެ.
ރައީސުލްޖުމްހޫރިއްޔާ ވަނީ ރައްޔިތުންގެ ފަރާތުން ހުށަހެޅުއްވި ކަންކަން، ކަމާގުޅުންހުރި ވުޒާރާތަކުގެ ސަމާލުކަމަށް ގެންނަވާ، އަންނަ އަހަރުގެ ބަޖެޓުގައި ހިމަނުއްވައިގެންވެސް އިތުރު ކަންކަން ފަހިކޮށްދިނުމަށް މަސައްކަތް ކޮށްދެއްވާނެކަމުގެ ޔަޤީންކަން މަންދޫގެ ރައްޔިތުންނަށް ދެއްވާފައެވެ.
39 ހެކްޓަރުގެ މަންދޫއަކީ އާބާދީގައި ގާތްގަނޑަކަށް 500 އަށްވުރެ ގިނަ މީހުން ދިރިއުޅެމުން އަންނަ ރަށެކެވެ. މިއީ މިއަތޮޅުގެ މީހުން ދިރިއުޅޭ އެހެން ރަށްރަށާ އަޅާބަލާއިރު ތަންކޮޅެއް ދުރުގައި ވަކިން އޮންނަ ރަށެކެވެ.
ކިޔުންތެރިންގެ ހިޔާލު