49 މީހުންނާ އެކު ދަތުރު ކުރަމުން ދިޔަ ފަސިންޖަރުން އުފުލާ މަތިންދާބޯޓެއް ރަޝިޔާގެ އިރުމަތީ އަމޫރް ސަރަޙައްދަށް ވެއްޓިއްޖެއެވެ. އެއީ، އަންތޯނޮފް އޭއެން-24 މަރުކާގެ މަތިންދާބޯޓެކެވެ. އެ ސަރަޙައްދުގެ ގަވަރުނަރު ވަސީލީ އަރްލޯފް ވިދާޅުވީ، ވެއްޓުނު މަތިންދާބޯޓުގައި 43 ފަސިންޖަރުން ތިބި ކަމަށާއި، އޭގެ ތެރޭގައި ހަތަރުު ކުޑަކުދިން ހިމެނޭ ކަމުގައެވެ. އޭގައި ހަ ފަޅުވެރިން ތިބި ކަމުގައި ވެސް އޭނާ ވިދާޅުވިއެވެ. މި ހާދިސާގައި އެ އެންމެން މަރުވެފައިވާ ކަމުގައި ބެލެވުނު ނަމަވެސް، ރަސްމީ އެއްވެސް އިދާރާއަކުން އެ ކަން ކަށަވަރު ކޮށްދީފައެއް ނެތެވެ.
ވެއްޓިފައި ވަނީ ބްލަގާވިއެއިޝެންސްކުން ފުރައިގެން 570 ކިލޯމީޓަރު ދުރުގައި އޮތް ތީންދާއަށް ދަތުރު ކުރި މަތިންދާބޯޓެކެވެ. ރަޝިޔާގެ ކުއްލިހާލަތްތަކާ ބެހޭ ޚިދުމަތުން ބުނީ، މަތިންދާބޯޓު ވެއްޓިފައި ވަނީ ތީންދާއާ 15 ކިލޯމީޓަރު ދުރުގައި އޮތް ޖަންގަލިބޯ ސަރަޙައްދަކަށް ކަމުގައެވެ. އަދި، ވެއްޓުނު ބޯޓުގެ ބައިތައް ފެނިފައިވާ ކަމުގައެވެ. އެ ސަރަޙައްދުން ދަތުރު ކުރަމުން ދިޔަ ހެލިކޮޕްޓަރަކުން ނަގާފައިވާ ވީޑިޔޯއަކުން ފެންނަނީ، ބޯޓުގެ ބައިތަކާއި އަލިފާންގަނޑެއް ރޯވެ، ދުން އަރަމުންދާ މަންޒަރެވެ.
މީހުން ސަލާމަތް ކުރާ ޓީމުތަކުން އެ ސަރަޙައްދަށް ދަތުރު ކުރުމަށް މަސައްކަތް ކުރަމުންދާ ކަމުގައި ވެސް ރަޝިޔާއިން ކުއްލިހާލަތްތަކާ ބެހޭ ޚިދުމަތުން ހާމަކުރިއެވެ. ވެއްޓިފައި ވަނީ ރަޝިޔާގެ އިރުމައްޗާއި އިރުމަތީ ސައިބީރިޔާގައި ވައިގެ ދަތުރުފަތުރުގެ ޚިދުމަތް ފޯރުކޮށްދޭ އަންގަރާ އެއަރލައިންސްގެ މަތިންދާބޯޓެކެވެ. ވެއްޓިފައިވާ ބޯޓުގެ ބައިތައް ފެނިފައި ވަނީ، ބޯޓު ގެއްލިގެން ހޯދުމުގެ މަސައްކަތް ކުރަމުން ދަނިކޮށެވެ.
ކިޔުންތެރިންގެ ހިޔާލު