ހުޅުމާލޭ ފޭސް 2 ގެ ނިރޮޅުމަގުގައި ތިން މީހުން އަރުވައިގެން ދުއްވި ސައިކަލެއް އެކްސިޑެންޓްވި މައްސަލައިގައި ލ. މާމެންދޫ، އިރުމަތީގެ، މުހައްމަދު ސައިފް (27 އަހަރު) ކޯޓު އަމުރެއްގެ ދަށުން ފުލުހުން ހައްޔަރުކޮށްފިއެވެ.
ފުލުހުން މައުލޫމާތު ދިން ގޮތުގައި، މި މަހުގެ 7 ވަނަ ދުވަހުގެ ދަންވަރުގެ ވަގުތެއްގައި ދެ ސައިކަލު ޖެހި ހިނގި މި އެކްސިޑެންޓުގައި އަނިޔާވި ސައިފް ހައްޔަރުކުރީ ހޮސްޕިޓަލުން ފަރުވާދިނުމަށްފަހު ދޫކޮށްލުމުން މި މަހުގެ 12 ވަނަ ދުވަހުއެވެ.
އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އޭނާ 7 ދުވަހުގެ މުއްދަތަށް ބަންދުގައި ބަހައްޓަން އަމުރުކޮށްފައެވެ.
މުހައްމަދު ސައިފަކީ ލައިސަންސް ނެތި ދުއްވުމުގެ 13 މައްސަލައެއްގެ ރެކޯޑުގެ އިތުރުން، އަހަރީ ފީއާއި ރޯޑްވާދިނަސް އަދި އިންޝުއަރެންސް ނެތި ދުއްވުމާއި، މުވާސަލާތީ ވަސީލަތެއް ބޭނުންކުރަމުން ދުއްވުމުގެ މައްސަލަތަކުގެ ރެކޯޑް އޮންނަ މީހެކެވެ.
މި އެކްސިޑެންޓުގައި އަނިޔާވި ދެ މީހަކަށް ވެންޓިލޭޓަރުގެ އެހީގައި އައިޖީއެމްއެޗްގައި އަންނަނީ ފަރުވާދެމުންނެވެ. މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
ކިޔުންތެރިންގެ ހިޔާލު