ހުޅުމާލެ ހިނގި އެކްސިޑެންޓުގައި ނިޔާވި ކުޑަކުއްޖާގެ ގައިގައި އެހެން ކާރަކުން ޖެހިފައިވާކަމަށް ބެލެވޭކަމަށް ދިވެހި ފުލުހުން ބުނެފިއެވެ.
ހުޅުމާލޭ ދެވަނަ ފިޔަވަހީގެ ވިނަރެސް ތަވަރުތައް ކައިރީގައި ހިނގި އެކްސިޑެނޓުގައި ޢުމުރުން 9 އަހަރުގެ ޒީވާ ސިނާން އަޙްމަދު ވަނީ ނިޔާވެފައެވެ. އެކުއްޖާ ނިޔާވީ ލިބުނު ޖަޚަމްތަކަށް އައިސީޔޫގައި ފަރުވާދެމުން ދަނިކޮށް އިއްޔެގެ ފަތިހުއެވެ.
މި މައްސަލަ ދިވެހި ފުލުހުން އަންނަނީ ތަހުގީގްކުރަމުންނެވެ. އެ ހާދިސާއާއި ގުޅޭގޮތުން ފުލުހުން ބުނީ ވީޑިއޯ ފުޓޭޖާއި އެކްސިޑެންޓް ސީނުން ތަހުގީގަށް މިހާތަނަށް އެނގިފައިވާ ގޮތުގައި، އެކްސިޑެންޓް ހިނގަން މެދުވެރިވީ މަގުގެ އެއްފަރާތުގައި މަޑުކޮށްފައި އޮތް ކާރެއްގެ ޑްރައިވަރު، ކާރަށް އަރަން އުޅުމުގެ ތެރޭގައި ކަމަށެވެ. އަދި އެވަގުތު އެ ކާރު އޯވަޓޭކް ކުރަން ދިޔަ ސައިކަލު އެމީހާގެ ގައިގައި ޖެހި، ސައިކަލު މަގުގެ ކަނާތްފަރާތު ލޭނަށް ވެއްޓުނުކަމަށާއި، އެވަގުތު އެ ލޭނުން ދުއްވާފައި އައި އެހެން ކާރެއް، ސައިކަލުން ވެއްޓުނު، ކުޑަކުއްޖާގެ ގައިގައި ޖެހިފައިވާކަމަށް ނުވަތަ އެ ކުއްޖާގެ ގައިމައްޗަށް ކާރު އަރާފައިވާކަމަށް ތަހުގީގަށް ބެލެވޭ ކަމަށް ފުލުހުން ބުންޏެވެ.
އެގޮތަށް ދިމާވީ ކާރަކަށް ކުއްލިއަކަށް މަޑުކުރަން ފުރުސަތު ނުލިބުމުންކަމަށް ބެލެވޭ ކަމަށްވެސް ފުލުހުން ބުންޏެވެ.
ނިޔާވި ކުއްޖާގެ ގައިގައި އެ ކާރުން ޖެހުނުކަން ނުވަތަ އެ ކާރު އެކުއްޖާގެ ގައިމައްޗަށް އަރާފައިވާކަން ކަށަވަރުކުރުމަށްޓަކައި ފޮރެންސިކް ތަހުލީލުތައް ކުރުމުގެ މަސައްކަތް ކުރަމުން އަންނަ ކަމަށްވެސް ފުލުހުން ބުންޏެވެ.
މި މައްސަލައާ ގުޅިގެން، އެކްސިޑެންޓުގައި ހިމެނޭ 3 އުޅަނދު ޓޯކޮށް، އެ އުޅަނދުތައް ދުއްވި 3 މީހުންގެ ލައިސަންސްވެސް ވަނީ ހިފަހައްޓާފައެވެ. އަދި މަޑުކޮށްގެން އޮތް ކާރުގެ ޑްރައިވަރު އެ އުޅަނދު ދުއްވާފައިވަނީ އޭނާގެ ލައިސަންސް ކުރިންވެސް ހިފަހައްޓާފައި ވަނިކޮށް ކަމަށްވާތީ، ފުލުހުން ވަނީ އޭނާ ޖޫރިމަނާކޮށް ފިޔަވަޅު އަޅާފައެވެ.
ކިޔުންތެރިންގެ ހިޔާލު