ވެލާނާ އިންޓަނޭޝަނަލް އެއާޕޯޓުގެ ޑިޕާޗާ ޓާމިނަލުން ސިނގިރޭޓު ކާޓޫންތަކެއް ނެރުނު މައްސަލައިގައި ފުލުހުންގެ އިސް އޮފިސަރުންތަކަކަށް ވެސް ތުހުމަތުކުރެވޭތީ އެ މައްސަލަ ބަލަން ފަށައިފިއެވެ.
ހޯމް މިނިސްޓްރީގެ ތަރުޖަމާނު ފާތިމަތު ރިފާއަތު ވިދާޅުވީ އެ މައްސަލައިގައި ފުލުހުންގެ އިސް އޮފިސަރުންތަކަކަށް ތުހުމަތުކުރެވޭތީ އެކަން ބަލަން ފަށާފައިވާ ކަމަށެވެ.
ސިނގިރޭޓު ބޭރުކުރުމުގައި ފުލުހުންގެ ބައެއް އިސް އޮފިސަރުންގެ ބައިވެރިވުންއޮތް ކަމަށް ތުހުމަތު ކުރެވޭއިރު، އެ ބޭފުޅުންގެ އެކައުންޓުތަކުގައި ގިނަ އަދަދަކަށް ފައިސާ ދައުރުކޮށްފައިވާ ކަމަށް ވެސް ތުހުމަތު ކުރެވެއެވެ.
އެ މައްސަލާގައި ހައްޔަރުކުރި ތިން މީހެއްގެ ވަނަވަރު ފުލުހުން ވަނީ އާންމުކޮށްފައެވެ. އެއީ މ. ސިލްވާނެސްޓް އަހުމަދު އަފްސަލާއި ދަފުތަރު ނަންބަރު ރސ. 14358 ޔޫސުފް ނަޒީރެވެ. ނަޒީރަކީ ފުލުހެކެވެ. އަފްސަލަކީ އެއާޕޯޓްގެ މުވައްޒަފެކެވެ.
ދެން ހައްޔަރުކުރީ، ނ. ވެލިދޫ، ގަސްކަރަ މުޙައްމަދު އައިހަމް (23އ) އެވެ. އެނގިފައިވާ ގޮތުގައި އެއީ ސިފައިންގެ މީހެކެވެ. އޭނާ ޑިއުޓީ އަދާކުރަނީ އެއާޕޯޓުގައެވެ.
ކިޔުންތެރިންގެ ހިޔާލު