ރާއްޖެއިން ނެދެލެންޑްސްއަށް ކަނޑައަޅުއްވާފައި ހުންނަވާ ނޮން-ރެސިޑެންޓް ސަފީރު ގީލާ އަލީ، ސަފީރުކަމުގެ ފަތްކޮޅު އަރުވައިފިއެވެ.

ރާއްޖެއިން ނެދެލެންޑްސްއަށް ކަނޑައަޅުއްވާފައި ހުންނަވާ ސަފީރު ގީލާ، އެކަމަނާގެ ސަފީރުކަމުގެ ފަތްކޮޅު ނެދެލެންޑްސްގެ ރަސްގެފާނު ވިލްއެމް އެލެގްޒެންޑާއަށް އަރުވާފައިވަނީ އިއްޔެ ހެނދުނު ދަ ހޭގުގައި ހުންނަ “ނޫރުދެއިންދް” ޕެލަސްގައި ބޭއްވި ރަސްމިއްޔާތެއްގައެވެ.

ފަތްކޮޅު އެރުވުމުގެ ރަސްމިއްޔާތަށްފަހު ބޭއްވި ޕްރައިވެޓް އޯޑިއަންސްގައި ސަފީރު ގީލާ ވަނީ ރައީސް ޑރ. މުހައްމަދު މުއިއްޒުގެ ފަރާތްޕުޅުން ނެދަލެންޑްސްގެ ރަސްގެފާނަށް ތަހުނިޔާ އާއި ހެޔޮއެދުން އަރިސްކުރައްވައިފައެވެ. އަދި ރާއްޖެ އާއި ނެދެލެންޑްސްއާ ދެމެދު އޮތް ގާތް ގުޅުން އިތުރަށް ހަރުދަނާކުރުމަށް މަސައްކަތް ކުރަމުންގެންދާނެ ކަމުގެ ޔަގީންކަން ގީލާ އެރުވިއެވެ.

ފޮރިން މިނިސްޓްރީން ބުނީ ރާއްޖެ އާއި ނެދެލަންޑްސްއާ ދެމެދު އޮތް ގުޅުމަށް 45 އަހަރު ވެފައިވާ އިރު، ފަތުރުވެރިކަމާއި ތަރައްގީގެ މަޝްރޫއުތަކުގައި ނެދެލަންޑްސް އަކީ މުހިންމު ބައިވެރިއެއް ކަމަށެވެ.

ފަތްކޮޅު އެރުވުމުގެ ރަސްމިއްޔާތުގައި، ގީލާގެ އަރިހުގައި އެކަމަނާގެ ފިރިކަލުން އަބްދުﷲ މުޝްރިފް އަދި ބެލްޖިއަމްގައި ހުންނަ ރާއްޖޭގެ އެމްބަސީގެ ފަސްޓް ސެކްރެޓަރީ، މުހައްމަދު ޝައްފާއު އިބްރާހީމް ބައިވެރިވެވަޑައިގެންނެވިއެވެ.