ރަމަޟާން މަހަށް ތައްޔާރުވުމުގެ ގޮތުން ދައުލަތުގެ މީޑިއާއިން ގެނެސްދިން “ރޯދައަށް ތައްޔާރު” ޕްރޮގްރާމުގައި އެމްޕީއެލްގެ ޗީފް އޮޕަރޭޓިންގ އޮފިސަރ އިލްޔާސް މުޙައްމަދު ވިދާޅުވެފައިވަނީ، މިދިޔަ އަހަރު ފެށުނުއިރު އެމްޕީއެލްގެ ސްޓޯރޭޖް ކެޕޭސިޓީ ހުރީ 3,600 ޓީއީޔޫގައި ކަމަށާއި، މިއަހަރު އެ އަދަދު 5,100 ޓީއީޔޫއަށް އިތުރުކުރެވިފައިވާ ކަމަށެވެ. މިއީ މިހާތަނަށް ލިބިފައިނުވާ ފާހަގަކޮށްލެވޭ ކުރިއެރުމެއް ކަމުގައި އިލްޔާސް ފާހަގަކުރެއްވިއެވެ.
އިތުރަށް އިލްޔާސް ވިދާޅުވީ، ރަމަޟާން މަހަށް ތައްޔާރުވުމުގެ ގޮތުން ގިނަގުނަ މަސައްކަތްތަކެއް ކުރެވިފައިވާ ކަމަށާއި، މިގޮތުން މިހާރު ބޭނުންކުރަމުންދާ ގުދަން، ރޯދަމަހަށް އެތެރެކުރެވޭ އަވަހަށް ހަލާކުވާ ޒާތުގެ މުދާ ރައްކާކުރެވޭނެ ތަނަކަށް ބަދަލުކުރެވިފައިވާ ކަމަށެވެ. އަދި އެހެނިހެން މުދާ ހުޅުމާލެއަށް ބަދަލުކޮށް، އެތަނުން ކްލިއަރ ކުރެވޭނެ އިންތިޒާމު ހަމަޖެހިފައިވާ ކަމަށާއި، ޔާޑު ސަރަޙައްދުގައި އިތުރު ގޭޓެއް ހުޅުވައި، އެތަނުން ވެސް މުދާ ކްލިއަރ ކުރެވޭނެ ގޮތަށް ތައްޔާރުވެފައިވާ ކަމަށް އިލްޔާސް ހާމަކުރެއްވިއެވެ.
އިލްޔާސް އިތުރަށް ފާހަގަކުރެއްވި ގޮތުގައި، ރަމަޟާން މަހަށް ޚާއްޞަކޮށް މުވައްޒަފުންގެ އަދަދު ވެސް އިތުރުކުރެވިފައިވާ ކަމަށާއި، އެމްޕީއެލް ވަނީ ރަމަޟާން މަހަށް ފުރިހަމައަށް ތައްޔާރުވެފައި ކަމަށެވެ.
ކިޔުންތެރިންގެ ހިޔާލު