ރާއްޖެ އާއި ޗައިނާ އާ ދެމެދު އަމަލުކުރަން ފަށާފައިވާ މިނިވަން ވިޔަފާރީގެ އެއްބަސްވުން (އެފްޓީއޭ) ގެ ދަށުން އެންސިސް ފިޝަރީޒްގެ މަހުގެ އުފެއްދުންތައް ޗައިނާގެ ބާޒާރަށް އެކްސްޕޯޓު ކުރުމުގެ އެއްބަސްވުމެއްގައި ސޮއިކޮށްފިއެވެ.
އެންސިސްގެ މަހުގެ އުފެއްދުންތައް ޗައިނާ އަށް އެކްސްޕޯޓު ކުރުމަށްޓަކައި ބެއިޖިންގެ ޝިންގުއާންގް ޝޯ ކޮމާޝަލް މެނޭޖްމަންޓް ކުންފުންޏާ އެކު ވަނީ އެއްބަސްވުމެއްގައި ސޮއިކޮށްފައެވެ.
މިއީ އެފްޓީއޭގެ ދަށުން ރާއްޖޭގެ މަހުގެ ބާވަތްތައް ޗައިނާ މާކެޓަށް ގެންދިޔުމުގައި ލިބުނު ވަރަށް ބޮޑު ކުރިއެރުމެކެވެ.
މި އަހަރުން ފެށިގެން އަމަލުކުރަން ފެށި އެފްޓީއޭގެ ދަށުން، ރާއްޖެ އިން ޗައިނާ އަށް އެކްސްޕޯޓްކުރާ މަހުގެ ހުރިހާ ބާވަތަކަށް ޑިއުޓީ މާފުވާނެއެވެ. އޭގެ ތެރޭގައި ތާޒާ، ފިނިކޮށްފައި އަދި ގަނޑުކޮށްފައި ހުންނަ ކަޅުބިލަމަހާއި ފާނައިގެ ބާވަތްތަކާއި އަދި ކަންނެލީގެ ބާވަތްތަކާއި މަސްދަޅާއި ވަޅޯ މަހާއި ލޮނު މަހުގެ އިތުރުން ސީފުޑްގެ ބާވަތްތައް ވެސް ހިމެނެއެވެ.
މީގެ އިތުރުން ވެސް، ސުން ޕަސެންޓު ޑިޔުޓީގައި 7،000 އަށް ވުރެ ގިނަ އައިޓަމް ޗައިނާ އަށް އެކްސްޕޯޓް ކުރެވޭނެ ކަމަށް ސަރުކާރުން ބުނެފައިވެއެވެ.
އެފްޓީއޭއަށް އަމަލުކުރަން ފެށުމުން ރާއްޖެ އާއި ޗައިނާއާ ދެމެދު ކުރާ ވިޔަފާރީގެ މުއާމަލާތްތައް އެއް ބިލިއަން ޑޮލަރަށް އިތުރު ކުރެވޭނެ ކަމަށް ސަރުކާރުން ލަފާކުރެއެވެ.
ކިޔުންތެރިންގެ ހިޔާލު