ޒަކާތު ހައުސްއަށް ހެޔޮއެދޭ ފަރާތްތަކުން ދޭ ފައިސާ ލިބިގަތުމުގެ ނިޒާމު ޤާއިމުކުރުމަށް މީރާއާއެކު މަޝްވަރާކުރެވިއްޖެއެވެ.
ޞަދަޤާތާއި، ޚައިރާތާއި، މިސްކިތް އިމާރާތްކުރުމާއި، ޤުރުއާން މަރުކަޒުތައް ޤާއިމުކުރުމަށް ހެޔޮއެދޭ ފަރާތްތަކުން ދޭ ފައިސާ ޒަކާތު ހައުސްއަށް ލިބިގަތުމުގެ ނިޒާމެއް ޤާއިމުކުރުމަށްޓަކައި، މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އާއެކު މަޝްވަރާ ބައްދަލުވުމެއް ބޭއްވިއްޖެއެވެ.
މި ބައްދަލުވުމުގައި އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދާއި މީރާގެ ޑިރެކްޓަރ ޖެނެރަލް ހަސަން ޒަރީރު ބައިވެރިވެވަޑައިގެންނެވިއެވެ.
މި ނިޒާމު ޤާއިމުކުރުމާ ގުޅޭގޮތުން އިސްލާމީ ކަންތައްތަކާބެހޭ ވަޒީރު ވިދާޅުވި ގޮތުގައި، ދިވެހިރާއްޖޭގެ ޒަކާތު ހައުސްއަށް މުދަލު ޒަކާތުގެ ފައިސާގެ އިތުރުން، ޞަދަޤާތާއި ޚައިރާތާއި ހިބައާއި އަދި މި ނޫންވެސް ހެޔޮކަންކަމަށް ހޭދަކުރަން ދެވޭ ފައިސާ ޖަމާކުރެވޭނެ ނިޒާމެއް އަންނަ ހަފުތާގައި ޤާއިމުކުރެވިގެންދާނެއެވެ. މި ނިޒާމުގެ މައިގަނޑު މަޤްޞަދަކީ ރާއްޖޭގެ ރައްޔިތުން ހެޔޮކަންކަމަށް ކުރާ ހޭދަ، ރާއްޖޭގައި އެންމެ ބޭނުންޖެހިފައިވާ ދާއިރާތަކަށް ހޭދަކުރުމުގެ ހަރުދަނާ ނިޒާމެއް އުފެއްދުމެވެ.
ވަޒީރު އިތުރަށް ފާހަގަކުރެއްވި ގޮތުގައި، ހެޔޮކަންކަމަށް ހޭދަކުރުމުގެ ޙާޖަތު ރާއްޖޭގައި ވަރަށް ބޮޑަށް އޮތް ހިނދު، ރާއްޖޭގެ މުޖުތަމަޢު ހެޔޮގޮތުގައި ބިނާކުރުމަށް އިސްކަންދިނުމަކީ މުހިންމު ކަމެކެވެ. މިގޮތުން، ގިނަ ރަށްރަށަށް މިސްކިތްތަކާއި ޤުރުއާން ކްލާސްތަކާއި އެތަންތަނަށް ބޭނުންވާ ވަސީލަތްތައް ހޯދުމަށް ޖެހިފައިވެއެވެ. އަދި ރާއްޖޭގެ ޒަކާތު ހައުސް ތަރައްޤީކުރަމުން މިދަނީ އިސްލާމީ ދުނިޔޭގެ ނަމޫނާ ޒަކާތުގެ އިދާރާއެއް ކަމުގައިވާ ކުވައިތު ޒަކާތު ހައުސް ނަމޫނައަކަށް ބަލައިގެންނެވެ.
ކިޔުންތެރިންގެ ހިޔާލު