ރައީސުލްޖުމްހޫރިއްޔާ ހުށަހެޅުއްވި ތިން ޤައުމަށް ނޮން-ރެޒިޑެންޓް ސަފީރުން ޢައްޔަންކުރެއްވުމަށް ރައްޔިތުންގެ މަޖިލީހުން ރުހުން ދެއްވައިފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ރައްޔިތުންގެ މަޖިލީހަށް ހުށަހެޅުއްވި ނަންފުޅުތަކަށް ރުހުން ދެއްވައި، ސްވިސް ކޮންފެޑެރޭޝަން، ބޫޓާން އަދި ކުވެއިތަށް ނޮން-ރެޒިޑެންޓް ސަފީރުން ޢައްޔަންކުރެއްވުމަށް މަޖިލީހުން ފާސްކޮށްފިއެވެ.
ސަފީރުކަމަށް ހުށަހެޅުއްވި ނަންފުޅުތަކަކީ:
1. ބޫޓާނަށް: ސ. ހުޅުދޫ / އަސަރީގެ، ޝިއުނީން ރަޝީދު (މިހާރު ބަންގްލަދޭޝްގައި ހުންނަވާ ދިވެހިރާއްޖޭގެ ސަފީރު)
2. ކުވެއިތަށް: މ. ވެސްޓްސައިޑް، އަޙްމަދު ސަރީރު (މިހާރު ސަޢޫދީ ޢަރަބިއްޔާގައި ހުންނަވާ ދިވެހިރާއްޖޭގެ ސަފީރު)
3. ސްވިސް ކޮންފެޑެރޭޝަނަށް: މ. ވިލާދޮށުގެ، ޑރ. ސަލްމާ ރަޝީދު (މިހާރު ޖެނީވާގައި ހުންނަ އ.ދ.ގެ މަރުކަޒުތަކަށް ދިވެހިރާއްޖެއިން ކަނޑައަޅުއްވާފައި ހުންނެވި ދާއިމީ މަންދޫބު)
މިއަދު ބޭއްވުނު މަޖިލީހުގެ ޖަލްސާގައި ވޯޓަށް އެހުމުން:
– ބޫޓާނަށް ޝިއުނީން ރަޝީދު ޢައްޔަންކުރެއްވުމަށް 72 މެންބަރުން
– ކުވެއިތަށް އަޙްމަދު ސަރީރު ޢައްޔަންކުރެއްވުމަށް 73 މެންބަރުން
– ސްވިސް ކޮންފެޑެރޭޝަނަށް ޑރ. ސަލްމާ ރަޝީދު ޢައްޔަންކުރެއްވުމަށް 74 މެންބަރުން
ތާއީދުކުރައްވައި ވޯޓު ދެއްވިއެވެ. މިއާއެކު، މި ތިން ޤައުމަށް ނޮން-ރެޒިޑެންޓް ސަފީރުންގެ ގޮތުގައި މި ތިން ބޭފުޅުން ޢައްޔަންކުރެއްވުމަށް މަޖިލީހުގެ ރުހުން ލިބިވަޑައިގެންފައިވެއެވެ.
ކިޔުންތެރިންގެ ހިޔާލު