މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ 2024 ވަނަ އަހަރުގެ މާލީ ހިސާބުތައް ދައްކާ ގޮތުގައި، ކުންފުންޏަށް އާމްދަނީގެ ގޮތުގައި 2.1 ބިލިއަން ރުފިޔާ ލިބިފައިވެއެވެ. މިއީ 2023 ވަނަ އަހަރާ އަޅާބަލާއިރު 32.1 އިންސައްތަ ދަށް އަދަދެކެވެ.
2024 ވަނަ އަހަރު ކުންފުނި ހިންގުމުގެ ފައިދާގެ ގޮތުގައި 211.2 މިލިއަން ރުފިޔާ ލިބިފައިވާއިރު، މިއީ 2023 ވަނަ އަހަރާ އަޅާބަލާއިރު 37.2 އިންސައްތަ ދަށް އަދަދެކެވެ. ޓެކުހަށް ކެނޑުމަށްފަހު، ސާފު ފައިދާގެ ގޮތުގައި އެމްޓީސީސީއަށް ލިބިފައިވަނީ 84.2 މިލިއަން ރުފިޔާއެވެ.
2024 ވަނަ އަހަރުގެ ހަތަރުވަނަ ކުއާޓަރުގައި އެމްޓީސީސީއިން ވަނީ 189 މަޝްރޫޢެއްގެ މަސައްކަތް ކުރިއަށް ގެންގޮސްފައެވެ. މީގެ ތެރެއިން 9 މަޝްރޫޢެއްގެ މަސައްކަތް ނިންމާލާފައިވާއިރު، އަލަށް 3 މަޝްރޫޢެއްގެ މަސައްކަތް ފަށާފައިވެއެވެ.
ނިމިގެންދިޔަ އަހަރުގެ ހަތަރުވަނަ ކުއާޓަރުގައި އެމްޓީސީސީއިން ނިންމާލެވުނު މުހިންމު މަޝްރޫޢުތަކުގެ ތެރޭގައި ނ. މާފަރު އެއަރޕޯޓް ތަރައްޤީކޮށް ފުޅާކުރުމުގެ މަޝްރޫޢުގެ ދެވަނަ ފިޔަވަހީގެ މަސައްކަތާއި، ހދ. ކުމުންދޫ ބަނދަރުގެ ޗެނަލް އެޅުމުގެ މަސައްކަތް، އަދި ބ. ކަމަދޫ ބަނދަރު އަލުން އިމާރާތްކުރުމުގެ ޑިޒައިން އަދި އިމާރާތްކުރުމުގެ މަސައްކަތް ހިމެނެއެވެ.
ކިޔުންތެރިންގެ ހިޔާލު