ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އިލެކްޝަންސް ކޮމިޝަން (އީސީ) ގެ ރައީސްކަމަށާއި ނައިބު ރައީސްކަމަށް ޢައކަމަށް ޢައްޔަންކުރެއްވުމަށް ހުށަހަޅުއްވާފައިވާ ނަންފުޅުތައް ދިރާސާކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ފޮނުއްވައިފިއެވެ.
އީސީގެ ރައީސްކަމަށް ހުށަހަޅުއްވާފައިވަނީ އެ ކޮމިޝަންގެ މެންބަރު މުޙައްމަދު ޒާހިދު (ދަފްތަރު ނަންބަރު ރސ 1548) ގެ ނަންފުޅެވެ. އަދި ނައިބު ރައީސްކަމަށް ހުށަހަޅުއްވާފައިވަނީ ޢަބްދުއްރަޙްމާން ޞަލާޙް ރަޝީދު (ރޯޒް/ކ.ހުރާ) ގެ ނަންފުޅެވެ.
މި ދެ ބޭފުޅުން އީސީގެ މެންބަރުކަމަށް ޢައްޔަންކުރެއްވީ ވޭތުވެދިޔަ މަހުގެ 26 ވަނަ ދުވަހުއެވެ. މި މަޤާމުތައް ހުސްވެފައިވަނީ އެ ކޮމިޝަނުގެ ކުރީގެ ނައިބު ރައީސް ޢަބްދުއްސަލާމާއި، މެންބަރު ޠާހާ މުޙައްމަދު އަމިއްލައަށް އިސްތިއުފާ ދެއްވުމާ ގުޅިގެންނެވެ.
މުޙައްމަދު ޒާހިދަކީ ކުރިން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗް.އާރް.ސީ.އެމް) ގެ ނައިބު ރައީސްކަމާއި، ޖެންޑަރ މިނިސްޓްރީގެ ޑެޕިއުޓީ މިނިސްޓަރުކަން ކުރައްވާފައިވާ ބޭފުޅެކެވެ. އަދި ޢަބްދުއްރަޙްމާން ޞަލާޙް ރަޝީދަކީ އީސީގެ ސެކްރެޓަރީ ޖެނެރަލްކަމާއި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ޕަރމަނަންޓް ސެކްރެޓަރީކަން ކުރައްވާފައިވާ ބޭފުޅެކެވެ.
ކިޔުންތެރިންގެ ހިޔާލު