ފަހިދިރިއުޅުން ކޯޕަރޭޝަންގެ ވެރިން ރައްޔިތުންގެ މަޖިލީހަށް ހާޒިރުކުރަން ގަލޮޅު އިތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ހުށަހަޅުއްވައިފިއެވެ.
ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުﷲ އަށް އެޑްރެސް ކުރައްވައި މުހައްމަދު އިބްރާހިމް އިއްޔެ ފޮނުވި ސިޓީގައި ބުނެފައި ވަނީ ހުޅުމާލެ ދެވަނަ ފިޔަވަހީގައި އިމާރާތް ކުރާ 4000 ހައުސިން ޔުނިޓުގެ މަޝްރޫއު ހިންގަން އިންޑިއާއިން ނެގި ލޯނުގެ ރިޕޭމަންޓުގެ ގޮތުގައި ކޮންމެ މަހަކު، 23.3 މިލިއަން ރުފިޔާ ދައުލަތުން ދައްކަމުންދާ ކަމަށެވެ. އަދި އެ ކުންފުނީގެ މުވައްޒަފުންގެ މުސާރަ އާއި ރިކަރަންޓު ޚަރަދުތަކަށް މަހަކު 3.2 މިލިއަން ރުފިޔާ ޚަރަދުވާކަން ތަފާސްހިސާބުތަކުން ހާމަވާ ކަމަށް ވެސް އެ ސިޓީގައި ފާހަގަކޮށްފައިވެއެވެ.
އޭނާ ލަފާކުރައްވާގޮތުގައި މިހާރު ނިންމާފައިވާ 744 ފްލެޓުތައް އޭގެ ހައްގުވެރިންނަށް ހަވާލުކޮށް މިހާރު މަސައްކަތް ނިމިފައި އޮތް ކޮމާޝަލް އޭރިއާ ކުއްޔަށް ދޫކޮށްފި ނަމަ ދައުލަތަށް މަހަކު 10 މިލިއަން ރުފިޔާ ލިބޭނެއެވެ.
ދައުލަތަށް ގެއްލުންވަނީ ނިމިފައި ހުރި ފްލެޓްތައް ހަވާލުނުކުރާތީ ކަމަށް އެ ސިޓީގައިވެއެވެ. އޭނާ ވިދާޅުވަނީ އެއީ ގަސްތުގައި ދައުލަތަށް ގެއްލުންދިނުމުގެ ގޮތުން ކުރާ ކަމެއް ކަމަށެވެ.
އެ ކުންފުނީގެ ވެރިން ހާޒިރުކުރާ ސަބަބަކީ ދައުލަތަށް ގެއްލުންވާ ގޮތަށް އަމަލު ކުރަމުންދަނީ ކޮން ސަބަބަކާ ހުރެތޯ ސުވާލުކުރުމަށް ކަމަށް މެމްބަރު ކުޑޫ ވިދާޅުވިއެވެ.
ސަރުކާރުން ބުނެފައި ވަނީ ރޯދަ މަސް ނިމުމުގެ ކުރިން ފްލެޓް ލިބޭ 4000 މީހުންގެ ލިސްޓް އާންމުކުރާނެ ކަމަށެވެ.
ކިޔުންތެރިންގެ ހިޔާލު