ރައީސް ޑރ. މުހައްމަދު މުއިއްޒު މުހިންމު ސިޔާސަތެއް ތަންފީޒު ކުރުމަށް މޯލްޑިވްސް އިމިގްރޭޝަނުން ހިންގާ ހާއްސަ އޮޕަރޭޝަންގެ ދަށުން މާލޭގެ ދެ ތަނެއް ބަލައި ފާސްކޮށް، ފިލައިގެން އުޅުނު ބިދޭސީއަކު އިމިގްރޭޝަނުގެ ބެލުމުގެ ދަށަށް ގެނެސްފިއެވެ.

މޯލްޑިވްސް އިމިގްރޭޝަނުން ބުނީ، “އިމިގްރޭޝަން ވޮޗް” އަށް ލިބުނު މަޢުލޫމާތަކާ ގުޅިގެން، އިއްޔެ ޓާސްކު ފޯހުން މާލޭގެ ދެ ތަނެއް ބަލައި ފާސްކޮށްފައިވާ ކަމަށެވެ.

އެގޮތުން ބިދޭސީ މީހާ އަތުލައިގަތީ ލިބުނު މައުލޫމާތަކާ ގުޅިގެން އޭނާ ފިލައިގެން އުޅުނުތަން ބަލައި ފާސްކޮށްގެން ކަމަށް އިމިގްރޭޝަނުން ބުންޏެވެ.

ގަވާއިދާ ޚިލާފަށް އުޅޭ ބިދޭސީން ހޯދުމަށް އިމިގްރޭޝަނުން ހިންގި އޮޕަރޭޝަންގައި މިހާތަނަށް 5،600 އަށްވުރެ ގިނަ މީހުން ވަނީ އަނބުރާ ގައުމަށް ފޮނުވާލާފައެވެ. މީގެތެރެއިން ގިނައީ ބަންގްލަދޭޝަށް ނިސްބަތްވާ މީހުންނެވެ.

މީގެއިތުރުން ރާއްޖޭގައި އުޅޭ ހުރިހާ ބިދޭސީންގެ ފިންގާޕްރިންޓް އެއްކުރުމުގެ މަސައްކަތް ހޯމް މިނިސްޓްރީއާ ގުޅިގެން އިމިގްރޭޝަނުން އަންނަނީ ކުރަމުންނެވެ.