ޝަރީއަތް ނިމެންދެން ބަންދުގައި މިހާރު ތިބި މީހުންނަކީ މުޖުތަމައުއަށް ނުރައްކާތެރި ކުށްވެރިން ކަމަށް ޕޮލިސް ކޮމިޝަނަރު އަލީ ޝުޖާއު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޝަރީޢަތް ނިމެންދެން މީހުން ބަންދުކުރުމާ ގުޅޭ މައްސަލަތައް ޙައްލުކުރުމަށް ބޭއްވި “ބަންދު ފޯރަމް”ގެ ތެރެއިން ކުރިއަށްގެންދިޔަ ޕެނަލް ޑިސްކަޝަންގައި ވާހަކަފުޅުދައްކަވަމުންނެވެ.
ޝުޖާއު ވިދާޅުވީ ބޮޑެތި ކުށްކުށަށް އަރައިގަނެފައިވާ މީހުން ބަންދުގައި ބައިތިއްބަންޖެހެނީ އެ މީހުން ދޫކޮށްލައިފިނަމަ މުޖުތަމަޢަށާއި ޝަރީޢަތަށް ގެއްލުންތަކެއް ވާނެތީކަމަށެވެ. އަދި ބަންދުގައި ތިބޭ އެފަދަ ކުށްވެރިން ދޫކޮށްލުމުން މުޖުތަމައުއަށް އެކަމުގެ ނޭދެވޭ އަސަރުކޮށްފައިވާކަން ސީޕީ ފާހަގަކުރެއްވިއެވެ.
“ޤާނޫނުތަކަށް ބަދަލު ގެނެސްގެން ޓެގް އެޅުވިގެން މޮނިޓަރކުރެވިދާނެ. ޤާނޫނީ އޮނިގަނޑެއްގެ ތެރެއިން މޮނިޓަރކުރެވޭނެ ނިޒާމެއް ނެތި ހައްޔަރުކުރުމުގެ މަޤުޞައްދު ހާސިލެއް ނުވާނެ. މިވަގުތު ބަޔަކު ދޫކޮށްލުމަކީ ރަނގަޅު ކަމެއް ނޫން.” ކޮމިޝަނަރު ވިދާޅުވިއެވެ.
މިވަގުތު ބަންދުގައި ތިބި މީހުންގެ ތެރޭގައި މަސްތުވާތަކެތީގެ މައްސަލަތަކާއި ޖިންސީގޯނާގެ މައްސަލަތަކުގައި ހައްޔަރުކުރި މީހުން ހިމެނޭ ކަމަށް ކޮމިޝަނަރު ވިދާޅުވިއެވެ.
ކިޔުންތެރިންގެ ހިޔާލު