ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މާޅޮސްމަޑުލު އުތުރުބުރީގެ ކިނޮޅަހަށް ކުރެއްވި ރަސްމީ ދަތުރުފުޅުގައި، ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން، މި ސަރުކާރުގެ އަމާޒަކީ ވަށާޖެހޭ ތަރައްޤީ ޤައުމަށް ގެނެސްދިނުން ކަމުގައި އިޢުލާނު ކުރެއްވިއެވެ.
އެމަނިކުފާނުގެ ވާހަކަފުޅުގައި، ރަށުގެ ކުޑަކުދިން ހުށަހެޅުއްވި ޕާކުގެ ބޭނުމާ ގުޅޭގޮތުން ވިދާޅުވަމުން، އާބާދީގެ ބޮޑުކުޑަމިނަކަށް ބެއްލެވުމެއް ނެތި، ހުރިހާ ރަށެއްގައިވެސް ކުޑަކުދިންނަށް ކުޅެވޭނެ ޕާކުތައް ޤާއިމުކުރުމަކީ ތަރައްޤީގެ މުހިންމު ބައެއް ކަމުގައި ފާހަގަކުރެއްވިއެވެ. މި ގޮތުން، ކިނޮޅަހުގައި ކުޑަކުދިންގެ ޕާކެއް މި އަހަރު ތެރޭގައި ތަރައްޤީކޮށްދެއްވާނެ ކަމުގެ ޔަޤީންކަން ދެއްވިއެވެ.
އިތުރުން، ރައްޔިތުންގެ ޖިސްމާނީ އަދި ނަފްސާނީ ދުޅަހެޔޮކަމަށް އަމާޒުކޮށް، ސަރުކާރުން ގިނަ މަޝްރޫޢުތަކެއް ރޭވިފައިވާ ކަމަށް ވިދާޅުވިއެވެ. މީގެ ތެރޭގައި:
1. ފުޓްސަލް ދަނޑަކާއި ވޮލީ ކޯޓެއް މި އަހަރު ތެރޭގައި ޤާއިމުކުރުން
2. ޤައުމީ ފެންވަރުގައި ހޭންޑްބޯލް ކުޅިވަރު ކުރިއެރުވުމަށް ޚާއްޞަ ޕްލޭނެއް އެކުލަވާލުން
3. ތަޢުލީމީ ދާއިރާ ހަރުދަނާކުރުމަށް ސްކޫލާއި، ކައުންސިލާއި އަދި ތަޢުލީމީ ވުޒާރާ ގުޅިގެން މަސައްކަތްކުރުން
4. ޞިއްޙީ ދާއިރާ ތަރައްޤީކުރުމުގެ މަސައްކަތްތައް ކުރިއަށް ގެންދިއުން
5. މި އަހަރު ތެރޭގައި ފުލުހުންގެ ޚިދުމަތް ޤާއިމުކުރުމުގެ މަސައްކަތް ފެށުން
ރަށުގެ އިޤްތިޞާދީ ކުރިއެރުމަށް ބާރުއެޅުމުގެ ގޮތުން، ލޯކަލް ޓޫރިޒަމް ތަރައްޤީކުރުމަށް ކަނޑައެޅިފައިވާ ސަރަޙައްދަށް ފެނާއި ނަރުދަމާގެ ޚިދުމަތް ފޯރުކޮށްދެއްވާނެ ކަމަށް ވިދާޅުވިއެވެ. އަދި ޤައުމީ ފެންވަރުގައި ޕަބްލިކް ލައިބްރަރީ ޚިދުމަތް ޤާއިމުކުރުމަކީވެސް ސަރުކާރުގެ ސިޔާސަތެއް ކަމުގައި ހާމަކުރެއްވިއެވެ.
މި ރަސްމިއްޔާތުގައި، ކިނޮޅަހުގައި އޭ.ޓީ.އެމް ބެހެއްޓުމާ ގުޅޭ އެއްބަސްވުމެއްގައި ބޭންކް އޮފް މޯލްޑިވްސް އާއި ރަށު ކައުންސިލާ ދެމެދު ސޮއިކުރެވުނެވެ.
ކިޔުންތެރިންގެ ހިޔާލު