ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މާޅޮސްމަޑުލު އުތުރުބުރީ ރަސްމާދޫގައި ގެދޮރުވެރިކަމުގެ މަޝްރޫޢެއް ތަންފީޒުކުރައްވާނެކަމަށް އިޢުލާނުކުރައްވައިފިއެވެ. މި އިޢުލާނު ކުރެއްވީ، އެ ސަރަޙައްދުގެ ބައެއް ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިން، ރަސްމާދޫ ރައްޔިތުންނާއެކު ބޭއްވެވި ބައްދަލުވުމެއްގައެވެ.
ރައީސުލްޖުމްހޫރިއްޔާ ވިދާޅުވި ގޮތުގައި، މި އަހަރުގެ ބަޖެޓުގައި ބޯހިޔާވަހިކަމަށް އެންމެ އިސްކަމެއް ދެއްވާފައިވަނީ، ގެދޮރުގެ ދަތިކަމާއި ތޮއްޖެހުމަކީ އިޖުތިމާޢީ މައްސަލަތަކުގެ މައިގަނޑު ސަބަބު ކަމަށް ވާތީއެވެ. މި ގޮތުން، ރަސްމާދޫގައިވެސް މި މައްސަލައަށް ޙައްލެއް ހޯދުމަށްޓަކައި ހައުސިންގ ޔުނިޓުތަކުގެ މަޝްރޫޢެއް ކުރިއަށް ގެންދަވާނެކަމަށް އެމަނިކުފާނު އިޢުލާނުކުރެއްވިއެވެ.
މީގެ އިތުރުން، ރަސްމާދޫގައި ހުއްޓިފައިވާ މުހިންމު މަޝްރޫޢުތައް އަލުން ފެށުމަށް ރޭވިފައިވާކަން ރައީސުލްޖުމްހޫރިއްޔާ ފާހަގަކުރެއްވިއެވެ. މީގެ ތެރޭގައި:
1. ފެނުގެ ނިޒާމުގެ މަސައްކަތް އަލުން ފަށައި ނިންމުން
2. ސްކޫލުގެ ނުނިމިހުރި މަސައްކަތްތައް ފުރިހަމަކުރުން
3. ކުޅިވަރާއި ހަށިހެޔޮކަމުގެ ދާއިރާއިން ބޭނުންވާ ވަސީލަތްތައް ޤާއިމުކުރުން
4. ލެބޯޓްރީއެއް ހިމެނޭ ގޮތަށް ރަށު ސިއްޙީ މަރުކަޒުގެ ޖާގަ އިތުރުކުރުން
އަދި ރަސްމާދޫގައި ފުލުހުންގެ ޚިދުމަތް ވީހާވެސް އަވަހަކަށް ޤާއިމުކުރުމަށް ނިންމަވާފައިވާކަމަށާއި، ރަސްމާދޫ އެންޓަނާ ބަދަލުކުރުމާ ގުޅޭ މައްސަލަ ޙައްލުކުރެއްވުމަށް މަސައްކަތްކުރައްވާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
މި ބައްދަލުވުމުގައި، ރަސްމާދޫގައި އޭ.ޓީ.އެމް ބެހެއްޓުމާ ގުޅޭ އެއްބަސްވުމެއްގައި ބޭންކް އޮފް މޯލްޑިވްސްއާއި ރަށު ކައުންސިލާ ދެމެދު ސޮއިކުރެވުނެވެ.
ކިޔުންތެރިންގެ ހިޔާލު