ޔޫއެފާ ނޭޝަންސް ލީގުގެ ގްރޫޕް 3 ގައި ރޭ ކްރޮއޭޝިޔާ އާއި ދެކޮޅަށް ސްޕެއިން ކުޅުނު މެޗުގައި ލަމީން ޔަމާލް ޖެހި ދެ ލަނޑާއެކު 4-1 ގެ ނަތީޖާއަކުން ސްޕެއިން މޮޅުވެއްޖެއެވެ.
ސްޕެއިންގެ ސެވިއްޔާގައި 40 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ 2 ވަނަ މިނިޓުގައި ލަމީޞް ޔަމާލް ވަނީ ލަނޑެއް ޖަހާ ދުނިޔޭގެ ޗެމްޕިއަން, ސްޕެއިން އަށް ލީޑު ނަގައިދީފައެވެ.
ނަމަވެސް މި މެޗުގެ 28 ވަނަ މިނިޓުގައި ކްރޮއޭޝިޔާގެ އިވާން ޕެރިސިޗް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށް ސްޕެއިންއަށް ސިހުން ގެނުވާފައެވެ.
ސްޕެއިން އިން މޮޅު ކުޅުމެއް ދައްކާފައިވާ މި މެޗުގެ ފުރަތަމަ ހާފުގެ ކުޅުން ނިމުމުގެ ކުރިން ސްޕެއިން އިން ވަނީ ދެވަނަ ފަހަރަށް ކުރި ހޯދާފައެވެ. މި ލަނޑު މެޗުގެ 31 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ މާކް ޕުބިލް އެވެ.
މި މެޗުގައި ސްޕެއިން އިން ޖެހި ތިންވަނަ ލަނޑު މެޗުގެ 63 ވަނަ މިނިޓުގައި ލަމީން ޔަމާލް ކާމިޔާބުކޮށްދީފައިވާއިރު މެޗުގެ ފުރިހަމަ ވަގުތު ހަމަވާން މިނިޓަކަށް ވެފައިވަނިކޮށް ނިކޯ ވިލިއަމްސް ވަނީ އިތުރު ލަނޑެއް ޖަހާ މެޗުގެ ނަތީޖާ 4-1 އަށް ބަދަލުކޮށްފައެވެ.
ސްޕެއިން މި މެޗުން މޮޅުވުމާއިއެކު އެ ޓީމަށް ވަނީ ގްރޫޕްގައި މިހާތަނަށް ކުޅުނު ދެ މެޗުން ލިބިފައިވާ 6 ޕޮއިންޓާއެކު ގްރޫޕްގެ އެއްވަނަ މަގާމް ލިބިފައެވެ. ކްރޮއޭޝިޔާ 2 މެޗު ކުޅެފައިވާއިރު އެ ޓީމަށް ލިބިފައިވާ 3 ޕޮއިންޓާއެކު އޮތީ ތިންވަނައިގަ އެވެ.
ކިޔުންތެރިންގެ ހިޔާލު