ގދ. ތިނަދޫ އިންޑަސްޓްރިއަލް ޒޯނުގައި މިފްކޯ އަށް ކަނޑައަޅާފައިވާ ސަރަހައްދުގައި ގާއިމުކުރާ ކޯލްޑް ސްޓޯރޭޖްގެ ސިވިލް މަސައްކަތްތަކާއި އެއާ ގުޅޭ ފެސިލިޓީތަކުގެ މަސައްކަތުގެ ބޮޑު ބައެއް ނިމިފައިވާކަން އެމްޓީސީސީ އިން ހާމަކޮށްފިއެވެ.
މި މަޝްރޫއުގެ ދަށުން ކޯލްޑް ސްޓޯރޭޖްގެ ފައުންޑޭޝަން މަސައްކަތާއި، ޑީސަލް ޓޭންކުގެ ފައުންޑޭޝަން މަސައްކަތުގެ އިތުރުން، އެއް ފަންގިފިލާގެ 4,790 އަކަފޫޓުގެ އިދާރީ އޮފީސް އިމާރާތެއް ގާއިމުކުރުމުގެ މަސައްކަތް ދަނީ ކުރެވެމުންނެވެ. އަދި އެއް ފަންގިފިލާގެ 261 އަކަފޫޓުގެ ކެމިކަލް ރައްކާކުރާ އިމާރާތަކާއި، 266 އަކަފޫޓުގެ ލޮނު ރައްކާކުރާ އިމާރާތެއްގެ އިތުރުން 3,050 އަކަފޫޓަށް ވުރެ ބޮޑު ސަރަހައްދެއްގައި ރީ-އިންފޯސްޑް ކޮންކްރީޓް ޕޭވިން އެޅުމުގެ މަސައްކަތްވެސް ހިމެނެއެވެ.
ސައުދީ ޑިވެލޮޕްމެންޓް ފަންޑުގެ އެހީގައި ކުރިއަށްގެންދާ މި މަޝްރޫއުގެ މަސައްކަތް އެމްޓީސީސީއާ ހަވާލުކޮށްފައިވަނީ 12 ޖުލައި 2023 ގައެވެ. އެމްޓީސީސީން ބުނެފައިވަނީ ކޯލްޑް ސްޓޯރޭޖްގެ ސިވިލް މަސައްކަތްތަކުގެ އިތުރުން ކެމިކަލް އަދި ލޮނު ރައްކާކުރާ ފެސިލިޓީގެ މަސައްކަތްތައް ހަލުވިކަމާއެކު ކުރިއަށްދާ ކަމަށެވެ.
ތިނަދޫގައި 1,000 ޓަނުގެ މަސް ފިނިކުރާ ކޯލްޑް ސްޓޯރޭޖެއް ގާއިމުކުރުމުގެ އަމާޒަކީ ހުވަދު އަތޮޅުގެ މަސްވެރިންނަށް ބޭނުންވާ ހިދުމަތްތައް ފުޅާދާއިރާއެއްގައި ފޯރުކޮށްދިނުމެވެ. ސަރުކާރުގެ އަމާޒަކީ ކުރިއަށް އޮތް އަހަރުގެ ތެރޭގައި އެ ފެސިލިޓީގެ މަސައްކަތް މުޅިން ނިންމައި މަސްވެރިންނަށް ހިދުމަތް ދޭން ފެށުމެވެ.
ފިޝަރީޒް މިނިސްޓަރު އަހުމަދު ޝިޔާމް ވިދާޅުވެފައިވަނީ ތިނަދޫ ކޯލްޑް ސްޓޯރޭޖްގެ މަސައްކަތް އަވަސްކޮށް، މަސް ގަންނަން ފެށުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާއްސަ އިސްކަމެއް ދެއްވާ ކަމަށެވެ. މި މަޝްރޫއު ނިމި އޮޕަރޭޝަނަށް އައުމުން، މިއީ ހުވަދުއަތޮޅު ދެކުނުބުރީގައި އެންމެ އަވަހަށް ހިދުމަތް ދޭން ފަށާ ކޯލްޑް ސްޓޯރޭޖް ފެސިލިޓީއަށް ވެގެންދާނެއެވެ.
ކިޔުންތެރިންގެ ހިޔާލު