ދިވެހިރާއްޖެއާއި ގަތަރާ ދެމެދު އޮތް އިގްތިސާދީ އަދި ވިޔަފާރީގެ ގުޅުން އިތުރަށް ހަރުދަނާކުރުމާ ގުޅޭގޮތުން ދެ ގައުމުގެ ދެމެދުގައި މަތީ ފަންތީގެ ރަސްމީ މަޝްވަރާތަކެއް ބާއްވައިފިއެވެ.
މި މަޝްވަރާތައް ކުރިއަށްދިޔައީ މާލީ ވަޒީރު ހަސަން ޒަރީރު، މިހާރު ގަތަރުގެ ވެރިރަށް ދޯހާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، އެ ގައުމުގެ މާލީ ވަޒީރު ޢަލީ ބިން އަޙްމަދު އަލް ކުވާރީއާ ބައްދަލުކުރައްވައި ބޭއްވެވި ބައްދަލުކުރެއްވުމުގައެވެ.
ދޯހާގައި ބޭއްވުނު މި ބައްދަލުކުރެއްވުމުގައި ދެ ގައުމުގެ ދެމެދުގައި އިގްތިސާދީ ގޮތުން އެއްބާރުލުން ފުޅާކުރެވިދާނެ އައު ދާއިރާތަކާ ގުޅޭގޮތުން ދެ ބޭފުޅުން ފުޅާ ދާއިރާއެއްގައި މަޝްވަރާކުރެއްވިއެވެ. މިގޮތުން ރާއްޖޭގެ އިގްތިސާދުގައި އަމިއްލަ ވިޔަފާރިތަކުގެ ދައުރު ފުޅާކުރުމަށް ހުރި ފުރުސަތުތަކާއި، ދެ ގައުމުގެ ދެމެދުގައި އިންވެސްޓްމަންޓްތައް އިތުރުކުރެވޭނެ އުސޫލުތަކާ ގުޅޭގޮތުން މަޝްވަރާކުރެއްވިއެވެ.
މީގެ އިތުރުން ދެ ގައުމުގެ ދެމެދުގައި އޮތް ޒަމާންވީ އަހުވަންތަ ގުޅުމުގެ މައްޗަށް ބިނާކޮށް ދެފަރާތުގެ މަސްލަހަތު ހިމެނޭ އެކި ދާއިރާތަކުން ގުޅުން ބަދަހިކުރުމަށާއި، ދެމެހެއްޓެނިވި އިގްތިސާދީ ކުރިއެރުމާއި ތަރައްގީ ހާސިލުކުރުމަށް ގުޅިގެން މަސައްކަތްކުރުމާ ގުޅޭގޮތުން ވެސް ދެ ވަޒީރުން ވާހަކަފުޅު ދެއްކެވިއެވެ.
ގަތަރަކީ ޒަމާނުއްސުރެ ރާއްޖެއާ ގާތް ގުޅުމެއް ބާއްވަމުން އަންނަ، އަދި ރާއްޖޭގެ ތަރައްގީގެ މުހިންމު ބައިވެރިއެކެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ހާރިޖީ ސިޔާސަތުގެ ދަށުން އެކުވެރި ގައުމުތަކާއެކު އޮންނަ އިގްތިސާދީ އަދި ވިޔަފާރީގެ ގުޅުންތައް ހަރުދަނާކޮށް ބޭރުގެ އިންވެސްޓްމަންޓްތަކަށް ރާއްޖޭގައި ފަހި މާހައުލެއް ގާއިމުކުރުމަށް ހާއްސަ އިސްކަމެއް ދެއްވައެވެ.
ކިޔުންތެރިންގެ ހިޔާލު