ދިވެހިރާއްޖޭގައި ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި ކަމަށާއި، މިއަދު އެމަނިކުފާނު އެކަން ހަނދުމަފުޅުނެތީ ކަމަށް ވެދާނެ ކަމަށް ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.
ބަންޑާރަ ނައިބު އަޙްމަދު އުޝާމް މިހެން ވިދާޅުވީ، ރަސްމާލެ މަޝްރޫޢާ ގުޅުވައިގެން ދެކެވެމުންދާ ވާހަކަތަކާ ގުޅިގެން “އެކްސް” ގައި ކުރެއްވި ޕޯސްޓެއްގައެވެ.
އުޝާމް ފާހަގަކުރެއްވި ގޮތުގައި، ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ޤާނޫނެއް އެކުލަވާލެވުނީ 1999 ވަނަ އަހަރުއެވެ. އެ ޤާނޫނުގެ ދަށުން ފުރަތަމަ ޓޫރިސްޓް ރިޒޯޓުތައް ކުއްޔަށް ދެމުން އައީ ގިނަވެގެން 25 އަހަރު ދުވަހުގެ މުއްދަތަށެވެ. ނަމަވެސް، ޤާނޫނަށް ގެނެވުނު އިސްލާހަކުން އެ މުއްދަތު 50 އަހަރަށް އިތުރުކުރީ 2010 ވަނަ އަހަރު ރައީސް މުޙައްމަދު ނަޝީދުގެ ވެރިކަމުގައެވެ. އަދި އެއަށްފަހު އެ މުއްދަތު 99 އަހަރަށް އިތުރުކޮށްފައިވަނީ 2015 ވަނަ އަހަރު ރައީސް ޔާމީންގެ ވެރިކަމުގައެވެ.
މީގެއިތުރުން، ޓޫރިޒަމާބެހޭ ޤާނޫނުގެ 8 ވަނަ މާއްދާގައި ބަޔާންކޮށްފައިވާ ގޮތުން، ޓޫރިސްޓް ރިޒޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެ ރަށެއްގައި ކޮށްފައިވާ އިންވެސްޓްމަންޓެއްގެ އަގުން ބާކީ ކެނޑުމަށްފަހު ޖެހޭ އަގު، އިންވެސްޓްކޮށްފައިވާ ފަރާތަށް ސަރުކާރުން ދައްކަންޖެހޭކަންވެސް އޭނާ ފާހަގަކުރެއްވިއެވެ.
ރަސްމާލެ މަޝްރޫޢާ ގުޅޭގޮތުން ވާހަކަދައްކަވަމުން ބަންޑާރަ ނައިބު ވިދާޅުވީ، ރަސްމާލޭގައި ހިންގުމަށް ރާވާފައިވާ މަޝްރޫޢު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ޤާނޫނުގެ ދަށުން ކަމަށެވެ. އަދި މި މަޝްރޫޢާ ގުޅިގެން މިހާތަނަށް ސޮއިކޮށްފައިވަނީ ހަމައެކަނި ލެޓަރ އޮފް އިންޓެންޓް (ކޮމާޝަލް ޓަރމްސް އެގްރީމެންޓް) އެއްގައި ކަމަށްވެސް ވިދާޅުވިއެވެ.
އުޝާމް އިތުރަށް ވިދާޅުވީ، މި މަޝްރޫޢު އަމަލީ ގޮތުން ފެށުމުގެ ކުރިން އެ އެގްރީމެންޓުގައިވާ ޓަރމްސްތަކުގެ މައްޗަށް ބިނާކޮށް، އިތުރަށް މަޝްވަރާކޮށްގެން އެކުލަވާލާ ޑެފިނިޓިވް އެގްރީމެންޓްތަކެއްގައި ސޮއިކުރަން ޖެހޭނެ ކަމަށެވެ. އަދި މިކަމާ ގުޅުންހުރި ޤާނޫނުތައް ރައްޔިތުންގެ މަޖިލީހުން ފާސްކުރަންޖެހޭނެ ކަމަށްވެސް އޭނާ ވިދާޅުވިއެވެ.
ނިންމަވާލައްވަމުން ބަންޑާރަ ނައިބު ވަނީ، މި މަޝްރޫޢު ކުރިއަށް ގެންދިއުމުގައި ދިވެހިރާއްޖޭގެ ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ސަރުކާރުން ނުކުރާނެ ކަމުގެ ފުރިހަމަ ޔަޤީންކަން ދެއްވާފައެވެ.
ކިޔުންތެރިންގެ ހިޔާލު