ރާއްޖޭގެ މަސް އެކްސްޕޯޓު ވުމަށް ފަހު، މަސް ރިޖެކްޓްވާ މައްސަލަ މިހާރު ޙައްލުކޮށްފައިވާކަމަށް މަސްވެރިކަމާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ވަޒީރުންގެ އަހާ ފޯރަމްގައި ރޭ ވާހަކަފުޅު ދައްކަވަމުން ވަޒީރު ވަނީ މަސްވެރިކަމުގެ ސިނާއަތުގައި އެންމެ ބޮޑު ދައުރެއް އަދާކުރަނީ ސަރުކާރުގެ މަސް ކުންފުނި މިފްކޯކަން ފާހަގަކުރައްވާފައެވެ. އަދި މިމައްސަލައަކީ މިފްކޯއިން އެކްސްޕޯޓު ކުރާ މަހާއި ގުޅުވައި ފެންމަތިވި މައްސަލައެއްކަން ވަޒީރު ފާހަގަކުރެއްވިއެވެ.
ވަޒީރު ވިދާޅުވީ މީގެ ކުރިން، ރައްޔިތުންގެ މަޖިލީހުގެ މެންބަރެއްގެ ގޮތުގައި މަސައްކަތް ކުރެއްވި ދުވަސްވަރު އާންމުކޮށް މަސް ރިޖެކްޓްވާ މިންވަރަށް ވުރެ އިތުރަށް މަސް ބޭރުގެ ކުންފުނިތަކުން ރިޖެކްޓްވަމުންދާކަން ފާހަގަކުރެވުނު ކަމަށެވެ. އެގޮތުން ޝިޕްމެންޓްގު 10 އިންސައްތަ ނުވަތަ 12 އިންސައްތަ ރިޖެކްޓްވި ކަމަށް ވަޒީރު ވިދާޅުވިއެވެ. އޭރު އެކަން ހިންގަމުންދިޔަ ގޮތަށް ބަލާއިރު، އެކަމުގައި ގޯސްތަކެއް ހުރި ކަމަށް ތުހުމަތު ކުރެވުނު ކަމަށްވެސް ވަޒީރު ޝީޔާމް ވިދާޅުވިއެވެ. ނަމަވެސް ސަރުކާރައި ހަވާލުވެ މިކަން ހައްލުކުރުމަށް ހަރުދަނާ ފިޔަވަޅުތަކެއް އެޅިގެން ދިޔަ ކަމަށް ވަޒީރު ވިދާޅުވިއެވެ. މިމައްސަލައަކީ ޒަމާންވީ މައްސަލައަކަށްވެފައި މިކަމުގެ ތެރޭގައި ބޮޑެތި “ނެޓްވޯކްތަކެއް” ހުރުމުން އެކަން ރަނގަޅު ކުރާނަމަ، ދިވެހިން މިކަމުގައި ތެދުވެރިވާންޖެހޭނެ ކަމަށް ވަޒީރު ވިދާޅުވިއެވެ.
ވަޒީރު ވަނީ މިހާރު ރާއްޖެއިން އެއްވެސް ވަރަކަށް މަސް ރިޖެކްޓްވާނެ ގޮތަށް މަސް އެކްސްޕޯޓު ނުކުރާ ކަމަށެވެ. އޭގެ ބަދަލުގައި މިހާރު އުސޫލަށް ބަދަލުތަކެއް ގެނެސްފައިވާ ކަމަށް، ވަޒީރު ވިދާޅުވިއެވެ.
ވަޒީރު ވިދާޅުވީ މިފްކޯގެ މަސް “ރިޖެކްޓް”ވާނަމަ މިހާރު އެކަން ހިނގާނީ މިފްކޯގެ މަސްކިރާ ބޯޓުތަކާ ހަމައިން ބޭރުގެ ކުންފުނީގެ އެޖެންޓެއް އެތަނުގައި ހުރެގެން ކަމަށެވެ. އެހެންވެ ރާއްޖެއިން ބޭރަށް ފޮނުވާ މަހުގެ ތެރެއިން ކުރިން “ރިޖެކްޓް”ވާ ކަމަށް ބުނާ އަދަދަށް މިހާރު އެކަން ނުހިނގާނެ ކަމުގެ ޔަގީންކަން މިނިސްޓަރު ދެއްވިއެވެ.
މިއަދު މަސްގަންނަ ކުންފުނިން، ދިވެހިރާއްޖޭގެ ބަނދަރެއްގައި މަސް ލޯޑު ކުރާ ގަޑީގައި ހުންނާނީ އެ މަސް އިންސްޕެކްޓް ކުރަން. އެހެންވީމަ އެހިސާބުން ރިޖެކްޓްވާ އެއްޗެއް ރިޖެކްޓްވަނީ. އޭގެ މާނައަކީ މިފްކޯގެ ބުކްގައި ރިޖެކްޓްވާކަށް މަހެއް ބޭރެއް ނުވާނެ. އެގޮތަށް އަޅުގަނޑުމެން މި ޢަމަލު ކުރަނީ.
މަސްވެރިކަމާއި ބެހޭ ވަޒީރު ވިދާޅުވިއެވެ.
ޝީޔާމް ސިނާއަތަށް ދިމާވެފައިވާ މިފަދަ މައްސަލަތައް ހައްލުކުރާނަމަ، މިފްކޯގެ އިތުރުން އަމިއްލަ ކުންފުނިތަކަށްވެސް ފުރުސަތު ފަހިކޮށްދޭންޖެހޭ ކަމަށް ވިދާޅުވެފައެވެ. ނަމަވެސް މިދިޔަ ސަރުކާރުގައި ބާޒާރުގައި މަހުގެ އަގު ހުރި މިންވަރަށް ބެލުމެއް ނެތި ސިޔާސަތު ބަދަލުކުރުމުގެ ސަބަބުން އަމިއްލަ ކުންފުނިތަކަށް ބޮޑެތި ގެއްލުންވެގެން ދިޔަ ކަމަށް ވަޒީރު ވިދާޅުވިއެވެ. ނަމަވެސް މިއަދު މަސްވެރިކަމުގެ ސިނާޢަތް ހަމަމަގަށް އެޅުވުމަށް ކުރެވުނު މަސައްކަތުން ނަތީޖާ ފެންނަ ކަމަށް ވަޒީރު ވިދާޅުވިއެވެ.
މިފްކޯއަކީ ސަރުކާރުގެ 100 ޕަސަންޓް ހިއްސާވާ ކުންފުންޏަކަށް ވާތީ މަސްވެރިކަމުގެ ސިނާއަތުގައި ހަރަކާތްތެރިވާ އެންމެންގެ ލޯ އަމާޒު ވަނީ މިފްކޯއަށް ކަމަށާއި ހުރިހާ ސަރުކާރަކުން އިސްކަންދެނީވެސް މިފްކޯއަށް ކަމުގައި ޝިޔާމު ވިދާޅުވި އެވެ. އެކަމަކު މަސްވެރިކަމުގެ ދާއިރާގައި ހަރަކާތްތެރިވާ އަމިއްލަ ކުންފުނިތަކެއް އެބަހުރި ކަމަށާއި ސަރުކާރުތަކަށް އެ ކުންފުނިތައް ނުފެނި ދިޔަ ދިއުމަކީ މަސްވެރިކަމުގެ ސިނާއަތް ދަށަށް ދިޔަ ސަބަބެއް ކަމުގައިވެސް ވިދާޅުވިއެވެ.
ރާއްޖޭގެ މަސްވެރިކަމުގެ ސިނާޢަތުގައި ބޭރުކުރާ މަހުގެ ތެރެއިން ބޮޑު ބައެއް ބޭރުކުރަނީ ރޯމަހުގެ ގޮތުގައެވެ. ރާއްޖޭގައި މަސް ރައްކާ ކުރުމަށް ބޭނުންވާ އެކަށީގެންވާ މިންވަރަށް ކޯލްޑް ސްޓޯރޭޖް ނެތުމުން މިފްކޯއަށް ގަންނަ މަސް އަވަހަށް ބޭރުކުރަން ޖެހެއެވެ. ނަމަވެސް ސަރުކާރުން ދަނީ ކޯލްޑް ސްޓޯރޭޖް ކެޕޭސިޓީ އިތުރުކުރުމަށް މަސައްކަތް ކުރަމުންނެވެ.
ކިޔުންތެރިންގެ ހިޔާލު