ދުނިޔެއަށް އައިސްފައިވާ ބަދަލުތަކާއި އަންނަމުންދާ ބަދަލުތަކާ ފައިހަމަވާނެ ގޮތަށް އދ.ގެ ސަލާމަތީ މަޖިލިސް އިސްލާހުކުރުމަށް ރާއްޖެއިން ހުށަހެޅުންތަކެއް ހުށަހަޅައިފިއެވެ.
މި ހުށަހެޅުންތައް ހުށަހެޅުއްވީ އދގެ އާއްމު މަޖިލީހުގައި މިރޭ ކުރެއްވި ތަގުރީރުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުހައްމަދު ލަތީފެވެ. ނައިބުރައީސް ވިދާޅުވީ މިއަދުގެ ދުނިޔެގެ މައްސަލަަކާމެދު ގޮތްތައް ނިންމަމުންދާއިރު، ސަލާމަތީ މަޖިލީހަކީ 1945 ވަނަ އަހަރުގެ ދުނިޔެ ރިވެލިވާ ގޮތަށް އޮތް މަޖިލީހަކަށް ވެގެންނުވާނެ ކަމަށެވެ.
އެ މަޖިލީހުގައި ހިމެނޭ ދާއިމީ އަދި ވަގުތީ މެންބަރުންގެ ކެޓަގަރީތައް މިހާރަށްވުރެ ފުޅާކުރަންޖެހޭކަމަށް އެމަނިކުފާނު ވިދާޅުވިއެވެ. އެގޮތުން އެމަނިކުފާނު ހުށަހެޅުއްވީ އދގެ ސަލާމަތީ މަޖިލީހުގައި ތަރައްގީވަމުން އަންނަ ކުދި ޖަޒީރާ ގައުމުތަކަށް ހާއްސަ ގޮނޑިއެއް ކަނޑައެޅުމަށެވެ. އެއާއެކު އެފްރިކާއަށް ނުދީ ހިފަހައްޓާފައި އޮންނަތާ އެތައް ޒަމާނެއްވީ ފުރުސަތު އެ ބައްރަށްދީ، އެ ބައްރުގެ ގައުމަކަށް ސަލާމަތީ މަޖިލީހުން ޖާގައެއް ދިނުމަށް ގޮވައިލެއްވިއެވެ.
އިތުރަށް އެމަނިކުފާނު ވިދާޅުވީ އދ.ގެ ސަލާމަތީ މަޖިލީހުގެ ދާއިމީ މެންބަރު ގައުމުތަކަށް ދީފައި އޮންނަ ވީޓޯކުރުމުގެ ބާރު އެކީ އުވައިލަންޖެހޭ ކަމަށެވެ. ތަމްސީލުކުރުމަކީ ރަމްޒީ ކަމެއް ނޫންކަމަށާއި، އެ މޭޒެއްގައި ނިންމޭ ނިންމުންތަކަކީ އެ މޭޒެއްގެ ދޮށުގައި އިށީންނަ ބަޔަކު ބައްޓަންކުރާ އެއްޗެއްކަމަށް އެމަނިކުފާނު ވިދާޅުވިއެވެ.
ވިޔަފާރިއާއި ފައިނޭންސްއާއި ސަޕްލައި ޗޭންތައް ސަލާމަތާ ލާމެހިފައިވާ މިންވަރު ކުދި ގައުމުތަކަށް ވަރަށް ރަނގަޅަށް ވިސްނޭކަން ފާހަގަކުރައްވަމުން ނައިބުރައީސް ވިދާޅުވީ ނަހަމަ ބާރާ ދެކޮޅަށް ކުދި ގައުމުތަކަށް ލިބޭ އެންމެ ބޮޑު ހިމާޔަތަކީ ބައިނަލްއަގުވާމީ ގާނޫނުތައްކަން ކުދި ގައުމުތަކަށް އެނގޭ ކަމަށެވެ.
އިގުތިސާދީ އަދި އިޖުތިމާއީ މަޖިލީހުގެ 2027 އިން 2029 އަށް އޮންނަ ދައުރުގެ މެންބަރުކަން ރާއްޖެއަށް ލިބިފައިވާކަނަް ފާހަގަކުރައްވަމުން ނައިބުރައީސް ވިދާޅުވީ އިންސާނީ ހައްގުތަކާ ބެހޭ މަޖިލީހުގ 2028 އިން 2030 ގެ ދައުރުގެ މެންބަރުކަމަަށް އިންތިހާބުވުމަށާއި، ސަލާމަތީ މަޖިލީހުގެ 2030 އިން 2034 ވަނަ އަހަރުގެ ދައުރުގައި އެ މަޖިލީހުގެ މެންބަރުކަމަށް އިންތިހާބުވުމަށް މެންބަރު ދައުލަތްތަކުގެ ތާއީދަށް ރާއްޖެއިން އެދޭ ކަމަށެވެ.
“ސަލާމަތީ މަޖިލީހުގެ މެންބަރުކަމަށް ރާއްޖެއިން ވާދަކުރަނީ ކުދި ގައުމުތަކަކީ ނިންމުންތައް ނިންމުމުގައި ބައިވެރިންނަށްވާންޖެހޭތީ. ހަމައެކަނި ނިންމުންތައް ބަލައިގަންނަން ތިބޭ ބަޔަކަށްވާންނުޖެހޭތީ.،” ނައިބުރައީސް ވިދާޅުވިއެވެ.
ނައިބުރައީސް އިތުރަށް ވިދާޅުވީ ފުރިހަމައަށް މެންބަރު ދައުލަތްތަކާއި އިންސާނީ ޖަމާއަތް ތަމްސީލުވާ ގޮތަށް ތަރުތީބުވާންޖެހެނީ އދގެ ގުނަވަންތައް އެކަނި ނޫން ކަމަށެވެ. އދ.ގެ ލީޑާޝިޕުވެސް އެގޮތަށް ތަރުތީބުވާންޖެހޭ ކަމަށެވެ. އެގޮތުން އދގެ އަމީން ޢާއްމު ގުޓަރޭޒްގެ ދައުރު ނިމުމަކަށް އަންނައިރު، އެމަނިކުފާނަށް ރާއްޖެއިިން ޝުކުރު އަދާކުރާ ކަމަށެވެ.
ގުޓަރޭޒްގެ ފަހުން އެ މަގާމާ ހަވާލުވެވަޑައިގަންނަވާ ބޭފުޅަކު އިހުތިޔާރުކުރުމުގެ އިޖުރާއާތު ހިނގަންވާނީ ދެ ފުށް ފެންނަ ގޮތަށްކަމަށާއި، އދއަށް ލިބިފައިވާ ހުނަރުތަކުގެ އެންމެ ފުނުން ބޭފުޅަކު އިހުތިޔާރުކުރަންޖެހޭކަން އެމަނިކުފާނު ފާހަގަކުރެއްވިއެވެ. ނައިބުރައީސްވަނީ ފާއިތުވި އަށް ދަހަރުގެ ތެރޭ އެ މަގާމަށް އަންހެން ބޭފުޅަކު އިންތިހާބުވެފައިނުވާކަން ފާހަގަކުރައްވައި މިއީ އދގެ ހިންގެވުމާ އަންހެން ބޭފުޅަކު ހަވާލުވެވަޑައިގަންނަވަން އެންމެ މުނާސަބަތު ވަގުތުކަމަށް ވިދާޅުވެފައެވެ.
“އދއަށް ބޭނުންވަނީ އިސްތިސްނާކުރުމެއް ނެތި އދ.ގެ ޗާޓަރު ދިފާއުކުރައްވާނެ ލީޑަރެއް. އެއީ އިސްލާހުތައް ނަތީޖާއަށް ބަދަލުކޮށްދެއްވައި، އެންމެ ކުދި މެންބަރު ގައުމުތައް ހިމެނޭހެން ހުރިހާ ދައުލަތެއްގެ އަަޑުއައްސަވާނެ ބޭފުޅެއް.،” ނައިބުރައީސް ވިދާޅުވިއެވެ.
ކިޔުންތެރިންގެ ހިޔާލު