ޖަޕާނުގައި މިހާރު ކުރިއަށްދާ،20 ވަނަ އޭޝިއަން ގޭމްސްގައި ޝޫޓިން ޓީމްގެ އައިޝަތު އީޝާ ޝަހީދު ގައުމީ ރެކޯޑެއް އާ ކޮށްފިއެވެ.
އީޝާ މި ރެކޯޑް އާކޮށްފައި ވަނީ އޭޝިއަން ގޭމްސްގައި މިއަދު އޮތް އަންހެނުންގެ 10 މީޓަރު އެއަރ ރައިފަލް އިވެންޓްގައި 624.1 ޕޮއިންޓް ހޯދައިގެންނެވެ. މީގެ ކުރިން އީޝާ މި ރެކޯޑް ހަދާފައިވަނީ 2025 ވަނަ އަހަރު ނޭޝަނަލް ޝޫޓިންގ ސްޕޯޓްސް ޗެމްޕިއަން ޝިޕްގައި ވާދަކޮށް 609.6 ޕޮއިންޓު ހޯދައިގެންނެވެ.
ނަގޯޔާގެ ޖެނެރަލް ޝޫޓިންގ ގެލެރީގައި ކުރިއަށްދާ އޭޝިއަން ގޭމްސްގެ ޝޫޓިން އިވެންޓްގައި ދިވެހި އިތުރު ދެޝޫޓަރުންވެސް ވަނީ މިކެޓަގަރީއިން ވާދަކޮށްފައެވެ. އެގޮތުން ދިވެހި ޓީމްގެ އައިޝަތު އީން އަސްލަމް ވަނީ މިއަދުގެ އިވެންޓްގައި 609.9 ޕޮއިންޓް ހޯދާފައެވެ.
މީގެ އިތުރުން ދެން މިކެޓަގަރީގައި ވާދަކުރި ދިވެހި ޝޫޓަރު އައިނާ ޝޮއުއާ އަޚްތަރު އިބްރާހީމް ވަނީ 599.5 ޕޮއިންޓް ހޯދާފައެވެ. މިއަދުގެ މި އިވެންޓްގައި އެކި ގައުމުތަކުން ޖުމްލަ 55 ޝޫޓަރުން ވާދަކުރިއެވެ.
މާދަމާ އޮންނަ ފިރިހެނުންގެ 10 މީޓަރު އެއަރ ރައިފަލް އިވެންޓްގައިވެސް ދިވެހި 3 ޝޫޓަރުން ބައިވެރިވާނެއެވެ. އެއީ އަޙްމަދު މާހިދު މުޙައްމަދު، އުމަރު މުޙައްމަދު ނަޝީދުގެ އިތުރުން އިބްރާހީމް ޝިފާނެވެ.
ކިޔުންތެރިންގެ ހިޔާލު