ޕީޕަލްސް ނެޝަނަލް ފްރަންޓް (ޕީއެންއެފް)ގެ މެންބަރުންނަށް ނޭނގި އެ ޕާޓީން ވަކިކުރަމުންދާ ކަމަށް ބުނެ ކުރަމުންދާ ތުހުމަތުތައް ދޮގުކޮށް، އެފަދަ ކަމެއް އެއްވެސް ފަރާތަކަށް ނުކުރެވޭނެ ކަމަށް އިލެކްޝަންސް ކޮމިޝަނުން ނޫސްބަޔާނެއް މެދުވެރިކޮށް މިއަދު ބުނެފިއެވެ.
އިލެކްޝަންސް ކޮމިޝަނުން މިފަދައިން ބަޔާން ނެރެފައިވަނީ، ޕީއެންއެފްގެ މެންބަރުން ޕާޓީން ވަކިކުރަމުންދާ ކަމަށް ބުނެ، އެ ކޮމިޝަނުގެ ރައީސް މުހައްމަދު ޝަކީލްގެ މައްޗަށް ޖިނާއީ ތަހުގީގެއް ކޮށްދިނުމަށް އެދި އެ ޕާޓީން ފުލުހަށް މައްސަލައެއް ހުށަހަޅާފައި ވަނިކޮށެވެ.
މި މައްސަލަ ފުލުހަށް ހުށަހެޅުމަށްފަހު ހެންވޭރު ޕޮލިސް ސްޓޭޝަން ކުރިމަތީގައި ހުންނަވައި، ޕީއެންއެފްގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވީ، އެ ޕާޓީން ހޯދި ހޯދުންތަކުން އިލެކްޝަންސް ކޮމިޝަނުގެ ތެރެއިން ގަވައިދާ ހިލާފަށް ޕާޓީން މީހުން ވަކިކުރާކަން އެނގިފައިވާ ކަމަށެވެ. އަދި އެހެނިހެން ޕާޓީތަކުގެ ދަފުތަރުގައި މީހުން ޖައްސާ ކަމާއި ޕީއެންއެފުން މީހުން ވަކިކުރާ ކަމަށް ސާބިތުހިފޭ ވަރަށް އެ ޕާޓީގައި ހެކި އެބަހުރި ކަމަށް ވެސް އޭނާ ވިދާޅުވިއެވެ.
މި މައްސަލަތަކާ ގުޅިގެން ކޮމިޝަނުގެ ރައީސް ޝަކީލްގެ މައްޗަށް ޖިނާއީ ތަހުގީގެއް ހިންގައިދިނުމަށް އެދުނުއިރު، އިލެކްޝަންސް ކޮމިޝަނުން ނެރުނު ބަޔާނުގައި ވަނީ އާންމުންގެ މެދުގައި ކޮމިޝަނަށާއި ޕާޓީތަކުގެ މެންބާޝިޕް ނިޒާމަށް އޮތް އިތުބާރު ގެއްލޭ ގޮތަށް ހަގީގަތާ ހިލާފު ވާހަކަތައް ނުފެތުރުމަށް އިލްތިމާސްކޮށްފައެވެ. އަދި ހުރިހާ ފަރާތްތަކުން ވެސް ޒިންމާދާރުކަމާއެކު ސިޔާސީ ހަރަކާތްތައް ހިންގުމަށް އެ ކޮމިޝަނުން ވަނީ އެދިފައެވެ.
ސިޔާސީ ޕާޓީތަކަށް މީހުން ވެއްދުމާއި ވަކިކުރުމުގައި އޮޅުވާލުންތައް ހިނގާ ކަމަށް ބުނެ އާންމުންނާއި ޕާޓީތަކުން ކުރަމުންދިޔަ ޝަކުވާތަކަށް ދާއިމީ ހައްލެއް ހޯދުމުގެ ގޮތުން، ޕާޓީތަކުގެ މެންބާޝިޕް ނިޒާމުގެ ތެރެއަށް އީ-ފާސް މިހާރު ވަނީ ތައާރަފުކޮށްފައި ކަމަށް ކޮމިޝަނުން ބުންޏެވެ.
އިލެކްޝަންސް ކޮމިޝަނުން ބުނި ގޮތުގައި، މިހާރު ގާއިމުކޮށްފައިވާ ނިޒާމުގެ ދަށުން ކޮންމެ ރައްޔިތަކަށް ވެސް އެ މީހެއްގެ އަމިއްލަ އީ-ފާސް މެދުވެރިކޮށް، ފުރިހަމަ އިހުތިޔާރުގައި ބޭނުން ވަގުތެއްގައި ޕާޓީއަކަށް ވަނުމާއި ވަކިވުމުގެ ފުރުސަތު ވަނީ ފަހިކޮށްދީފައެވެ. އަދި އެއީ ހަމައެކަނި އެ ފަރާތަކާއި ޕާޓީއަކާ ދެމެދު ހިނގާ މުއާމަލާތެއް ކަމަށާއި، މިއީ އިތުރު ފަރާތެއްގެ ބައިވެރިވުމެއް ނެތި ފަރުދީ މިނިވަންކަމުގެ ތެރެއިން ނިންމާ ނިންމުމެއް ކަމަށް އެ ކޮމިޝަނުން ފާހަގަކުރިއެވެ.
މިފަދަ ރައްކާތެރި އަދި ދެފުށް ފެންނަ ނިޒާމެއްގެ ތެރެއިން، އެއްވެސް ފަރާތަކަށް ނޭނގި ޕާޓީން ވަކިކުރުމަކީ ނުވަތަ އެހެން ޕާޓީއަކަށް ބަދަލުކުރުމަކީ އެ ކޮމިޝަނަށް ވެސް އަދި އެހެން ފަރާތަކަށް ވެސް ކުރެވޭނެ ކަމެއް ނޫން ކަމަށް ބަޔާނުގައި ވަނީ ބުނެފައެވެ.
ކިޔުންތެރިންގެ ހިޔާލު