އެޕަލް ކުންފުނީގެ އާ ޗީފް އެގްޒެކެޓިވް އޮފިސަރުގެ މަގާމާ ޖޯން ޓާނަސް ރަސްމީކޮށް ހަވާލުވެވަޑައިގެން އާޓިފިޝަލް އިންޓެލިޖެންސްގެ ދާއިރާއިން އެ ކުންފުންޏަށް ކުރިމަތިވެފައިވާ ބޮޑެތި ގޮންޖެހުންތަކާ ކުރިމަތިލައްވަން ފައްޓަވައިފިއެވެ.
ފާއިތުވި ފަނަރަ އަހަރު ދުވަހު އެ ކުންފުނީގެ އެންމެ އިސްވެރިޔާގެ މަގާމު ފުރުއްވި ޓިމް ކުކް ވަނީ ސެޕްޓެމްބަރު މަހުގެ ފުރަތަމަ ދުވަހު އެ މަގާމުން ވަކިވެވަޑައިގެންފައެވެ. އުމުރުން ފަންސާސް އެއް އަހަރުގެ ޓާނަސް މި މަގާމާ ހަވާލުވެވަޑައިގެންނެވިއިރު އެޕަލް ކުންފުންޏަށް ވަނީ ޒަމާނީ ޓެކްނޮލޮޖީގެ ރޭހުގައި އެހެން ކުންފުނިތަކާ ވާދަކުރުމުގެ ބޮޑު އިމްތިހާނަކާ ކުރިމަތިލާން ޖެހިފައެވެ.
އެޕަލް ކުންފުނީގެ ހާޑްވެއާ އިންޖިނިއަރިންގެ އިސްވެރިޔާގެ ގޮތުގައި ކުރިން މަސައްކަތްކުރެއްވި ޓާނަސްގެ އެންމެ ފުރަތަމަ ބޮޑު މަސައްކަތަކަށް ވާނީ މި މަހުގެ ނުވަ ވަނަ ދުވަހު ބާއްވާ ހާއްސަ ހަފުލާގައި އާ އުފެއްދުންތައް ދުނިޔެއަށް ދައްކައިލުމެވެ. މިއީ ފާއިތުވި ދިހަ އަހަރަށް ވުރެ ގިނަ ދުވަހުގެ ތެރޭގައި ޓިމް ކުކް ނެތި އެ ކުންފުނީގެ އާ އުފެއްދުންތައް ތައާރަފުކުރާ ފުރަތަމަ ފަހަރެވެ. މި ހަފުލާގައި ފަތްޖަހައިލެވޭ އައިފޯނެއް ފުރަތަމަ ފަހަރަށް ނެރޭނެ ކަމަށް ވަނީ ބެލެވިފައެވެ.
އާޓިފިޝަލް އިންޓެލިޖެންސްގެ އިތުރުން ޗައިނާގެ މާކެޓަށް ބަރޯސާވުން ކުޑަކުރުން ވެސް މި ގޮންޖެހުންތަކުގެ ތެރޭގައި ހިމެނެއެވެ. އަދި އެމެރިކާ ސަރުކާރުގެ ސިޔާސީ ފިއްތުންތަކުން ސަލާމަތްވުމަކީ ވެސް އާ ވެރިޔާއަށް އޮތް ބޮޑު އިމްތިހާނެކެވެ. އެޕަލްގެ ޗީފް އެގްޒެކެޓިވް އޮފިސަރުގެ މަގާމުން ވަކިވެވަޑައިގަތުމަށް ފަހު ޓިމް ކުކް ދެން މަސައްކަތްކުރައްވާނީ އެ ކުންފުނީގެ ބޯޑުގެ އެގްޒެކެޓިވް ޗެއާމަންގެ ގޮތުގައެވެ. ކުކްގެ ދިގު މުއްދަތުގައި އެޕަލްގެ އަގު ވަނީ ހަތަރު ޓްރިލިއަން ޑޮލަރާ ގާތްކުރާ މިންވަރަކަށް އިތުރުކޮށް ދުނިޔޭގެ އެންމެ އަގުބޮޑު އެއް ކުންފުންޏަށް އެ ކުންފުނި ހަދައިފައެވެ.
ކިޔުންތެރިންގެ ހިޔާލު