ނައިޖީރިއާގެ ވެރިރަށް އަބޫޖާއަށް އެތެރެވި ފަރާތެއްގެ ގައިން އެބޯލާ ބުންޑިބުގްޔޯ ވައިރަސް ފެނިފައިވާކަން އެ ގައުމުގެ ފެޑެރަލް މިނިސްޓްރީ އޮފް ހެލްތު އެންޑް ސޯޝަލް ވެލްފެއާއިން ވަނީ ހާމަކޮށްފައެވެ. އެ ވުޒާރާއިން ހާމަކުރި ގޮތުގައި، މި ބަލި ޖެހިފައިވަނީ ދާދި ފަހުން ޔުގެންޑާއަށް ޒިޔާރަތްކޮށްފައިވާ އަންހެނަކަށެވެ. މިއީ މިހާރު ހިނގަމުންދާ އެބޯލާގެ ބަލިމަޑުކަމުގެ ތެރޭގައި އެ ގައުމުން މި ބަލި ފެނުނު ފުރަތަމަ ފަހަރު ކަމަށްވާއިރު، މިއާއެކު މި ވައިރަސް ފެތުރިފައިވާ ފަސްވަނަ ގައުމަކަށް ނައިޖީރިއާ މިހާރު ވަނީ ވެފައެވެ.

ސިއްހަތާ ބެހޭ ވުޒާރާއިން މައުލޫމާތު ދިން ގޮތުގައި، އެ އަންހެން މީހާގެ ކިބައިން ބަލީގެ އަލާމާތްތައް ފެންނަން ފެށީ އޮކްޓޫބަރު މަހުގެ 7 ވަނަ ދުވަހުއެވެ. އަދި އަބޫޖާގެ އަމިއްލަ ކްލިނިކަކުން އޭނާ ފަރުވާ ހޯދުމަށްފަހު، ހެދި ލެބޯޓަރީ ތަހުލީލުތަކުން ބުންޑިބުގްޔޯ ވައިރަސް ހުރިކަން ސާބިތުވުމާ ގުޅިގެން، މިހާރު އޭނާ ވަނީ އެހެން މީހުންނާ ވަކިން ބަހައްޓައިގެން ފަރުވާ ދޭން ފަށާފައެވެ.

ޔުގެންޑާގެ ހެލްތު މިނިސްޓްރީން ބުނެފައިވަނީ އެ އަންހެން މީހާއަކީ އެ ގައުމު މެދުވެރިކޮށް ޓްރާންސިޓްވެގެން ދަތުރުކުރި ފަރާތެއް ކަމަށެވެ. އެހެންނަމަވެސް، އޭނާ ނައިޖީރިއާއަށް ދިޔަ ސީދާ ދުވަހާއި، އިރުމަތީ އެފްރިކާގެ ސަރަހައްދުން އޭނާގެ ހަށިގަނޑަށް ވައިރަސް ވާސިލުވި ގޮތާއި އެކަން ހިނގި ސީދާ ތަން އަދި ކަށަވަރުކުރެވިފައެއް ނުވެއެވެ. ނައިޖީރިއާގެ ސިއްހަތާ ބެހޭ ވުޒާރާއިން ފާހަގަކުރި ގޮތުގައި، އޭނާއަށް ބަލި ޖެހެން މެދުވެރިވި ސަބަބާއި ދަތުރުފަތުރުގެ ހުރިހާ މައުލޫމާތެއް އެއްކުރުމުގެ މަސައްކަތް މިހާރު ދަނީ ހިންގަމުންނެވެ.

އިޝްތިހާރު އިޝްތިހާރު

ނައިޖީރިއާގެ ހެލްތު މިނިސްޓަރު މުހައްމަދު ޕާޓޭ ބަޔާންކުރެއްވި ގޮތުގައި، އެ ބަލިމީހާއާ އެކި ގޮތްގޮތުން ދިމާވި 44 މީހަކު ފާހަގަކުރެވި، އެ މީހުންގެ ސިއްހީ ހާލަތު އަންނަނީ ވަރަށް ގާތުން ބަލަމުންނެވެ. މީގެ އިތުރުން ބައްޔަށް އެކްސްޕޯޒްވެފައިވާ އިތުރު މީހުން ހޯދުމުގެ މަސައްކަތް އިތުރަށް ވަރުގަދަކޮށްފައިވާ ކަމަށް ވެސް އެ ވުޒާރާއިން ބުންޏެވެ. އަދި މި ހާލަތާ ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތައް ވިލަރެސްކުރުމަށްޓަކައި، ނައިޖީރިއާ ސެންޓަރ ފޮރ ޑިޒީޒް ކޮންޓްރޯލް އެންޑް ޕްރިވެންޝަން (އެންސީޑީސީ) ގެ އިންސިޑެންޓް މެނޭޖްމަންޓް ސިސްޓަމް މިހާރު ވަނީ އޮޕަރޭޝަނަށް ގެނެސްފައެވެ.