ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) އިން އިންތިޒާމުކޮށްގެން ބަންގްލަދޭޝްގެ ޑާކާގައި ކުރިއަށްދިޔަ “ރީޖަނަލް ޓްރޭނިންގ އޮން މިއުޗުއަލް ލީގަލް އެސިސްޓެންސް (އެމްއެލްއޭ) ލިންކްޑް ވިތު މެރިޓައިމް ޑޮމެއިން އެވެއަރނަސް-ޑިރައިވްޑް އެވިޑެންސް” ތަމްރީނު ޕްރޮގްރާމުގައި ދިވެހި ފުލުހުންގެ ޚިދުމަތުގެ އޮފިސަރުން ބައިވެރިވެއްޖެއެވެ.
2026 އޮގަސްޓް 9 އިން 12 އަށް ކުރިއަށްދިޔަ މި ތަމްރީނު ޕްރޮގްރާމުގައި ދިވެހި ފުލުހުންގެ ޚިދުމަތުގެ ފަރާތުން ބައިވެރިވެވަޑައިގެންނެވީ ސީނިއަރ ސާޖަންޓް އަޙްމަދު ޒިޔާދު މުޙައްމަދު އާއި ސީނިއަރ ސާޖަންޓް އާމިނަތު ޝިރާންއެވެ.
މި ޕްރޮގްރާމަކީ ކަނޑުމަތީގެ ޖިނާއީ މައްސަލަތަކުގައި “މެރިޓައިމް ޑޮމެއިން އެވެއަރނަސް” މެދުވެރިކޮށް ހޯދޭ ހެކިބަހާއި މައުލޫމާތު ރައްކާތެރިކަމާއެކު ބެލެހެއްޓުމާއި، އެފަދަ ހެކި ހޯދުމަށް އެދުމާއި، އަދި “މިއުޗުއަލް ލީގަލް އެސިސްޓެންސް” (އެމްއެލްއޭ) އާއި ބައިނަލްއަގުވާމީ އެހީތެރިކަން ފޯރުކޮށްދޭ އެހެނިހެން ވަސީލަތްތައް މެދުވެރިކޮށް އެފަދަ ހެކި ފައިދާހުރި ގޮތެއްގައި ބޭނުންކުރުމުގެ ގާބިލުކަން ކަނޑުމަތީގެ ގާނޫނު ތަންފީޒުކުރާ އިދާރާތަކާއި، ޕްރޮސެކިއުޓަރުން އަދި ކަމާބެހޭ މަރުކަޒީ އިދާރާތަކުގައި އިތުރު ކުރުމަށް ހިންގޭ ޕްރޮފްރާމެކެވެ.
މިފަދަ ސަރަހައްދީ ތަމްރީނުތަކުގައި ބައިވެރިވުމަކީ ކަނޑުމަތީގެ ޖިނާއީ މައްސަލަތައް ތަހުގީގުކުރުމުގައި ބައިނަލްއަގުވާމީ ގާނޫނީ އެހީތެރިކަން ހޯދުމުގެ ނިޒާމު އިތުރަށް ހަރުދަނާވެ، ފުލުހުންގެ ފަންނީ ގާބިލުކަން އިތުރުވެގެންދާނެ ކަމެކެވެ.
ކިޔުންތެރިންގެ ހިޔާލު