މޯލްޑިވްސް ޕޮލިސް ސަރވިސްގެ ހުޅުމާލެ ޕޮލިސްގެ ފަރާތުން އިންތިޒާމުކޮށްގެން، ހުޅުމާލޭ ދެވަނަ ފިޔަވަހީގައި ދިރިއުޅޭ ކުޑަކުދިންނަށް ހާއްސަކޮށްގެން މަޖާ އަދި އުފާވެރި ހަވީރެއް ބޭއްވުމަށް ހަމަޖެހިއްޖެއެވެ.
މި ހަރަކާތް ކުރިއަށް ގެންދިއުމަށް ހަމަޖެހިފައިވަނީ މާދަމާ، 25 ސެޕްޓެންބަރު 2026 ވާ ހުކުރު ދުވަހުގެ ހަވީރު 4:00 އިން ފެށިގެން 6:00 އަށް، ހުޅުމާލޭ ދެވަނަ ފިޔަވަހީގެ ރުއްގަނޑު 3 ސަރަހައްދުގައެވެ.
ފުލުހުން ބުނީ،މި ހަވީރުގެ މައިގަނޑު މަގުސަދަކީ ކުޑަކުދިންނަށް އުފާވެރި މާހައުލެއްގައި ވަގުތު ހޭދަކުރުމުގެ ފުރުސަތު ފަހިކޮށްދިނުމާއި، ފުލުހުންނާއި އާންމު ރައްޔިތުންނާ ދެމެދު އޮންނަ ގުޅުން އިތުރަށް ބަދަހިކުރުން ކަމަށެވެ.
މި ހަވީރުގެ ތެރެއިން ބައިވެރިންނަށް ހާއްސަ ލަކީ ޑްރޯއެއް ކުރިއަށް ގެންދިއުމަށް ނިންމާފައިވެއެވެ. މި ގުރުއަތުން ހޮވޭ ފަރާތްތަކަށް އަގުހުރި ގިނަ އިނާމުތަކެއް ދިނުމަށް ހަމަޖެހިފައިވާއިރު، އޭގެ ތެރޭގައި ކުޑަކުދިން ދުއްވާ ނޫކުލައާއި ހުދުކުލައިގެ ކުޅޭ ދެ ޖީޕު ކާރާއި، ހެލްމެޓުގެ އިތުރުން ވެސް ގިނަ އަދަދެއްގެ ހަދިޔާތައް ހިމެނޭކަމަށް ފުލުހުން މައުލޫމާތު ދެއެވެ.
މީގެ އިތުރުން، މި އިވެންޓުގެ ތެރެއިން ކުޑަކުދިންނަށް ފުލުހުންގެ ޔުނީފޯމު ލައިގެން ފުލުހުންނާއެކު ފޮޓޯ ނެގުމާއި ވަގުތު ހޭދަކުރުމުގެ ފުރުސަތު ލިބިގެންދާނެއެވެ. އަދި ފުލުހުންގެ ހިދުމަތުގައި ބޭނުންކުރާ ސައިކަލު ފަދަ އުޅަނދުތަކަށް އަރައި، އެ ތަކެތި ތަޖުރިބާކޮށްލުމުގެ ފުރުސަތު ވެސް ކުޑަކުދިންނަށް ފަހިވެގެންދާނެއެވެ.
ހުޅުމާލެ ފުލުހުން ވަނީ މި ހަވީރުގައި ވީހާ ވެސް ގިނަ ކުޑަކުދިންނާއި ބެލެނިވެރިން ބައިވެރިވުމަށް ދައުވަތު އަރުވާފައެވެ.
ކިޔުންތެރިންގެ ހިޔާލު