އިނގިރޭސިވިލާތަށް ރާއްޖެއިން އެކްސްޕޯޓްކުރާ މަހުން ނަގަމުން އައި ޓެރިފް ކަނޑާލުމާ ގުޅިގެން ރާއްޖޭގައި މަސް ގަންނަ އަގުތައް ރަނގަޅުވެ، ވާދަވެރި ބާޒާރެއް އުފެދިފައިވާ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން މިނިސްޓަރު ވިދާޅުވީ، 14 އަހަރުވީ މަސައްކަތަށްފަހު އިނގިރޭސިވިލާތުން ނަގަމުން އައި 20 ޕަސެންޓުގެ ޓެރިފް ކަނޑާލުމުން އެންސިސް، ހޮރައިޒަން އަދި މިފްކޯ ފަދަ ކުންފުނިތަކަށް މަސްވެރިންގެ އަތުން މަސް ގަންނަ އަގު ރަނގަޅުކުރުމުގެ ފުރުސަތު ލިބިގެން ގޮސްފައިވާ ކަމަށެވެ. އެކަމުގެ ސަބަބުން މަސް ގަންނަ ކުންފުނިތަކުގެ މެދުގައި ހަގީގީ ވާދަވެރިކަމެއް އުފެދިގެން ގޮސްފައިވާ ކަމަށް އޭނާ ފާހަގަކުރެއްވިއެވެ.
މިނިސްޓަރު ވިދާޅުވި ގޮތުގައި ރާއްޖެއިން މިހާރު އިނގިރޭސިވިލާތަށް އަހަރަކު ގާތްގަނޑަކަށް 18 މިލިއަން ޕައުންޑްގެ މަސް ބޭރުކުރެއެވެ.
އަމިއްލަ ކުންފުނިތަކުން މިހާރު މަސް ކިލޯއެއް 21 ރުފިޔާއާއި 22 ރުފިޔާއާ ދެމެދުގެ އަގެއްގައި ގަންނަމުންދާއިރު، ސަރުކާރުންވެސް މަސް ކިލޯއެއް 20 ރުފިޔާއަށްވުރެ ދަށްނުވާނެ ގޮތަށް އަގު ހިފަހައްޓަމުންދާ ކަމަށް ޝިޔާމް ވިދާޅުވިއެވެ.
މަހަށް އެންމެ ރަނގަޅު އަގު ހޯދުމަށް އޮތް އެންމެ ބޮޑު ގޮންޖެހުމަކީ މަސް ވެލިއު އެޑް ކުރުމުގެ ނުވަތަ އިތުރު މުއްސަނދިކަން ގެނެސްގެން ބަންދުކުރުމުގެ ގާބިލުކަން ކުޑަވުން ކަމަށް މިނިސްޓަރު ވިދާޅުވިއެވެ. ނަމަވެސް އެކަން ހައްލުކުރުމަށް ސަރުކާރުން ހާއްސަ މަޝްރޫއުތަކެއް ކުރިއަށްގެންދާ ކަމަށް އޭނާ ފާހަގަކުރެއްވިއެވެ.
އެގޮތުން ދުވާލަކު 50 ޓަނު މަސް ދަޅުގައި ބަންދުކުރެވޭ މިންވަރު 300 ޓަނަށް އިތުރުކުރުމަށާއި، މަސް ރައްކާކުރެވޭ މިންވަރު 9,000 ޓަނުން 25,000 ޓަނަށް ބޮޑުކުރުމުގެ މަޝްރޫއުތައް ކުރިއަށްދާ ކަމަށް މިނިސްޓަރު ޝިޔާމް ވިދާޅުވިއެވެ.
ކިޔުންތެރިންގެ ހިޔާލު