ނ. އަތޮޅު ޅޮހީގެ އައިސްޕްލާންޓަށް ދިމާވި މައްސަލަ ހައްލު ކުރުމަށް އެ ރަށުގައި އައު އައިސްޕްލާންޓެއް ޤާއިމްކުރުމަށް ނިންމައިފިއެވެ.
ރައްޔިތުންގެ މަޖިލީހުގައި ވެލިދޫ ދާއިރާގެ މެންބަރު މުޙައްމަދު އައްބާސް ދެންނެވި ސުވާލަށް ޖަވާބުދެއްވަމުން މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވީ، ޅޮހީގައި މިހާރު ހުރި އައިސްޕްލާންޓުގެ ކެޕޭސިޓީ އިތުރު ކުރުމަށް ކުރި މަސައްކަތުން އެދެވޭ ނަތީޖާއެއް ލިބިފައިނުވާ ކަމަށެވެ. އެހެންކަމުން އެ ރަށުގައި މުޅިން އައު އައިސްޕްލާންޓެއް ގާއިމުކުރުމަށް ސަރުކާރުން ނިންމާފައިވާ ކަމަށް ވިދާޅުވިއެވެ. އަދި މިހާރު ހުރި އައިސްޕްލާންޓު މަރާމާތުކުރާނަމަ، އައު އައިސްޕްލާންޓެއްގެ އަގު ހޭދަވާ ކަމަށްވެސް ވަޒީރު ވިދާޅުވިއެވެ.
ސަރުކާރު ވެރިކަމާއި ހަވާލުވިއިރު ދިމާވި އެންމެ ބޮޑު ގޮންޖެހުމަކީ، ކުރިން މިފްކޯއިން ހިންގަމުންއައި އައިސްޕްލާންޓުތައް ފެނަކައާއި ހަވާލުކުރުމުން، އައިސްޕްލާންޓުގެ މަސައްކަތްތައް ނޭނގޭ ބަޔަކު އެ އައިސްޕްލާންޓުތައް ބަލަހައްޓަން ތިބުން ކަމަށެވެ. އޭގެ ސަބަބުން އައިސްޕްލާންޓުތަކަށް އަޅާނުލެވުމުން ދިމާވި މައްސަލަތަކުން އަދިވެސް އަރައިނުގަނެވޭ ކަމަށާއި ޅޮހީ އައިސްޕުލާންޓަކީ އެފަދަ ތަނެއްކަން ވަޒީރު ފާހަގަކުރެއްވިއެވެ.
ޅޮހީ އައިސްޕްލާންޓަށް އައު ކޮމްޕްރެޝަރެއް ގެންދެވިއްޖެ. ޖެންސެޓެއް ގެންދެވިއްޖެ. އޭގެ މުޅި ރެފްރިޖަރޭޝަން ނިޒާމް ބަދަލުކުރެވިއްޖެ. އަދިވެސް ފުލް ކެޕޭސިޓީގައި އައިސް ނުއުފެއްދޭ.
ވަޒީރު ޝިޔާމް ވިދާޅުވިއެވެ.
ޅޮހީ އައިސްޕްލާންޓަށް ކުރިމަތިވެފައިވާ މައްސަލައަށް މިއަހަރު ތެރޭ ދާއިމީ ހައްލެއް ގެނެސްދެއްވާނެ މަސްވެރިކަމާ ބެހޭ ވަޒީރު ވިދާޅުވިއެވެ.
ކިޔުންތެރިންގެ ހިޔާލު