ހުޅުމާލެ ފޭސް އެކެއްގައި ބިނާކުރާ “މަސްޖިދު އުންމުލްމުއުމިނީން ޢާއިޝާ رضی اللہ عنھا” ގެ 86 އިންސައްތަ މަސައްކަތް މިހާރު ނިމިފައިވާ ކަމަށް އިސްލާމިކް މިނިސްޓްރީން ހާމަކޮށްފިއެވެ.
އަލްމަރުހޫމް އައްޝައިޚް އިސްމާއީލް މުހައްމަދުގެ ދީލަތި އެހީގައި ބިނާކުރާ މި މިސްކިތުގެ ބިންގާ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އަޅުއްވައިދެއްވީ 2025 ވަނަ އަހަރުގެ ތެރޭގައެވެ. މާލާ ކޮންސްޓްރަކްޝަނާ ހަވާލުކޮށްގެން 20 މިލިއަން ރުފިޔާ ހަރަދުކޮށްގެން އިމާރާތްކުރާ މި މިސްކިތް މެނޭޖުކުރުމަށް ހަމަޖެހިފައިވަނީ މަދީނާ އިންވެސްޓްމެންޓުގެ ފަރާތުންނެވެ.
މި މިސްކިތް ބިނާކުރަނީ ހުޅުމާލެ ފޭސް އެކެއްގެ ރެޑްވޭވް ކައިރީގައި ކުރިން ހުރި ވަގުތީ މިސްކިތް ހުރި ބިމުގައެވެ. ކީރިތި ރަސޫލާގެ އަނބިކަނބަލުން އުންމުލްމުއުމިނީން ޢާއިޝާ رضی اللہ عنھا އަށް ނިސްބަތްކޮށް ބިނާކުރާ މި މިސްކިތަކީ އެތެރެއާއި ބޭރު ހިމެނޭހެން އެއްފަހަރާ 2،000 މީހުންނަށް ނަމާދުކުރެވޭނެ ޖާގައިގެ ދެ ބުރީގެ އިމާރާތެކެވެ.
މި މިސްކިތަކީ އިސްލާމީ ދިރާސާކުރާ ފަރާތްތަކަށާއި ކިޔަވާ ކުދިންނަށް ނަމާދުގެ ފަހުން ރިސާޗް ހެދުމަށާއި، އެސައިންމަންޓް ހެދުމަށް އަދި ފޮތްކިޔަން ތިބެވޭގޮތަށް ފުރިހަމަ ލައިބްރަރީއަކާއެކު ތަރައްގީކުރާ މިސްކިތެކެވެ. މީގެ އިތުރުން މިސްކިތުގައި އަންހެނުންނަށް ނަމާދުކުރެވޭނެ ޚާއްސަ ޖާގައާއި ފާހަނާގެ އިތުރުން، ޚާއްސަ އެހީއަށް ބޭނުންވާ ފަރާތްތަކަށް ފަސޭހައިން ވަދެއުޅެވޭނެ އިންތިޒާމުތައް ވަނީ ހަމަޖައްސައިފައެވެ.
މިސްކިތުގެ މަސައްކަތް ފުރިހަމަވެގެންދާއިރު ސޯލާ ނިޒާމަކުން ކަރަންޓުދީ، މުޅި މިސްކިތް އޭސީކުރުމަށް ވަނީ ނިންމައިފައެވެ. އަންނަ އަހަރުގެ ރަމަޟާން މަހަށް ހުޅުވުމަށް އަމާޒުހިފާފައިވާ މި މިސްކިތް ހުޅުވުމަށްފަހު، އިލްމީ ދަރުސްތަކާއި ގުރުއާން ހިތުދަސްކުރުމުގެ ތަފާތު މަޝްރޫއުތައް ކުރިއަށްގެންދިއުމަށް ވަނީ ރޭވިފައެވެ.
ކިޔުންތެރިންގެ ހިޔާލު