މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕަނީ (އެމްޓީސީސީ) އިން ބޭނުންކުރުމަށްފަހު ބާވެ ހަލާކުވެފައިވާ ނުވަ ބަހެއް ނީލަމުގައި ވިއްކާލުމަށް އެ ކުންފުނިން އިއުލާންކޮށް، އެ ނީލަން މާދަމާ ފެށުމަށް ވަނީ ހަމަޖައްސައިފައެވެ.
އެމްޓީސީސީން ހާމަކޮށްފައިވާ މައުލޫމާތުތަކަށް ބަލާއިރު، މި ނީލަމުގައި ވިއްކާލުމަށް ހަމަޖެހިފައިވަނީ ވޯލްވޯ ބްރޭންޑްގެ ދެ ބަހާއި، މޭން ބްރޭންޑްގެ ދެ ބަހުގެ އިތުރުން އަޝޯކް ލޭލެންޑް ބްރޭންޑްގެ ފަސް ބަހެވެ. މި ނީލަމުގައި އަގު ހުށަހަޅަން ބޭނުންވާ ފަރާތްތަކުން އެކަމަށް އެދި ސިޓީ ފޮނުވަން ޖެހެނީ މާލޭގެ ހެންވޭރުގައި ހުންނަ އެ ކުންފުނީގެ ޓްރޭޑިން ޑިވިޝަން ނުވަތަ ހެންވޭރު ސޯމިލަށެވެ.
ނީލަން ފެށޭ އަގުގެ ގޮތުގައި ކޮންމެ ބަހަކަށް ވެސް ކަނޑައަޅާފައިވަނީ 25,000 ރުފިޔާއެވެ. އަދި ނީލަމުގައި އަގު އިތުރުކުރަން ބޭނުންވާ ނަމަ، މަދުވެގެން 10,000 ރުފިޔާ އިތުރުކުރަން ޖެހޭނެ ކަމަށް އެމްޓީސީސީން މައުލޫމާތު ދެއެވެ. މީގެ އިތުރުން، މި ނީލަމުގައި ބައިވެރިވާން އެދޭ ފަރާތްތަކުން ސެކިއުރިޓީ ޑިޕޮސިޓްގެ ގޮތުގައި 10,000 ރުފިޔާ އެ ކުންފުނީގެ ބޭންކް އެކައުންޓަށް ޖަމާކުރަން ޖެހޭނެ ކަމަށް ވެސް އެ ކުންފުނީގެ އިއުލާނުގައި ބަޔާންކޮށްފައިވެއެވެ.
މި ނީލަމުގެ ކަންކަން ކުރިއަށްދާ ގޮތުގެ ތަފްސީލް ހާމަކުރަމުން އެމްޓީސީސީން ބުނީ، ކޮންމެ ދުވަހެއްގެ އެންމެ މަތީ އަގު މެންދުރުފަހު 12:00 ގެ ފަހުން ޓްރޭޑިން ޑިވިޝަންގެ ނޯޓިސް ބޯޑުން ފެންނަން ހުންނާނެ ކަމަށެވެ. އަދި ރަސްމީ ބަންދު ދުވަސްތައް ފިޔަވައި ޖެހިޖެހިގެން ދެ ދުވަހު އެއް އަގެއްގައި އޮވެއްޖެ ނަމަ، އެ އަގު ހުށަހެޅި ފަރާތަކަށް ނީލަން ކާމިޔާބުވީ ކަމަށް ނިންމާނެއެވެ. މި ނީލަމާ ގުޅޭ އިތުރު މައުލޫމާތު ސާފުކުރުމަށް ބޭނުންވާ ފަރާތްތަކުން އެމްޓީސީސީގެ ހޮޓްލައިން ނަންބަރު 1650 އަށް ގުޅައިގެން ނުވަތަ ކުންފުނީގެ އޮކްޝަން ނޯޓިސް ބޯޑުން އިތުރު ތަފްސީލް ހޯދޭނެއެވެ.
ކިޔުންތެރިންގެ ހިޔާލު